JOWAI: Meghalaya BSF-ni 4th Battalion, Indo-Bangladesh sima-ario dongenggipa manderangni be·en-bimang an·seng-baljoke donganiko ra·bana uamangni jotton ka·ani gita, Meghalaya-ni East aro West Jaintia Hills district-ni ning·o donggipa Dawki bajar a·jolo aro Jaliakhola primary skulo Civic Action Programme cum Free Medical camp-ko ong·at-aha. Uno DIG Sector HQ Jowai-ni K.S. Rana aro BSF 4 Bn Commandant Pankaj Soodan dongpae camp-ko mikkim gnangataha.
Camp-o BSF-ni doctor-rang, sima-ario dongenggipa Dawki, Bakur Jaliakhola aro Sankhat songrangni kangal-cholgri songni manderangko indin checup ka·e aro samrangko suale on·angaha. Sima-ari sepangjolo donggipa a·jolrangoni sak 400-na baten songni manderang medical check-up ka·e on·anirangko man·aha. Civic action program-o gong lak 6 tangkana bata, computer-rang, school-o nanganirangko, ceiling fan-rangko, chi donchakani-rangko, dustbin-rangko sima-ario songdonggipa dingtang dingtang a·jol-rangni skulrango poraigipa chatro-chatrirangna aro kangal-cholgrirangna suale on·angaha.
K.S. Rana DIG Sector HQ Jowai-ni Border Security Force indakgipa Civic Action Programme-rangko namedake aro gisik nange ong·ataha. BSF pangnan sima-ario donggipa manderangko dakchakna ku·rachakaha. Border Security Force-ni nambegipa kamrangna ua jolni manderangchi mittelanirangko man·aha.
