U·IATTIMGIPAONI
SHILLONG: Meghalaya a·dokni dingtang dingtang biaprango niam gri kulie kajina gile ra·enggipa toll ba check gate-rangni kosako maming ja·kurangko de·jaengani gimin a·dokni Home department aro district administration-koba Voice of the People’s Party (VPP) matnangataha.
Niam gri chalaienggipa toll gate-rangko Home department-an sandie chipatna gita nanga ine janapatengon, “Ia niam gri chalaienggipa toll gate-rangko chipatchina gita district council-rangna chitti seatmangmangaiachide kam ong·jawa. Ia toll gate-rangara niam gri chalaienggiparangsa ong·ode ia toll gate-rangko chipataibo. Niam gri chalaienggipa toll gate-rangkon chipatna man·jaenga ong·ode aro niam retirangkon rakkina man·jaenga ong·ode maidakgipa sorkarisa an·chingni a·dokko chalaienga?” ine VPP-ni spokesperson Batskhem Myrboh sing·doataha.
Kamrangko pangnan niamo pangchakesa ka·na nanga ine janapatengon, a·dokni Home department niam retirangko rakkina changjaenga ine Myrboh matnangataha.
“Ian namen kragijani ong·a aro jegalna kragipa kam ong·a. Ia kamko political dolrangsan ong·aigija manderangba jegalna kraa,” ine ua aganaha.
Meghalaya a·doko niam gri chalaienggipa toll gate-rangko chipattokaha ine a·dok sorkari a·kangahaoba, a·doko niam gri toll gate-rangko chalaiengkua ine adita salrangna skangsan Meghalaya Commercial Truck Owners & Drivers Association (MCTO&DA) parakatskaahachim ine nikna man·a.
MCTO&DA-ni president Moskalander Marngar-ni a·kangatani gitade, a·doko district council-rangni chalaienggipa dam 30 toll gate-rang donga indiba ia toll gate-rang, truck garirangoniko tik ka·gimin kajinarangkode ra·jaengachim. Ia toll gate-rang, salode truck gari bolprakoniko gong 300 ka·e ra·enga indiba walode gong 1000-mang ong·pilerang gilenga ine Marngar matnangatahachim.
KHADC-ni chalaienggipa toll gate-rangna kajinarangko gamani ja·manba truck garirang, Hima Mylliem-ni toll gate-rangnaba gamna nangkuenga ineba ua parakatahachim.
A·dok sorkari baksa working plan-ko tarikujaskal truck garirang, KHADC-ni toll gate-rangna kajinarangko gamjawaha ineba MCTO&DA parakataha.
