U·IATTIMGIPAONI
SHILLONG: Meghalaya a·doko class 1-oni class 10-ona NCERT-ni textbook-rangko ja·rikna miksonganirang dongengoba, a·doko songdongenggipa Tribal jatrangni daka rikani, itihas aro ku·sikrangkode galchangskana nangja ine Khasi Students Union (KSU) dabiangaha.
Meghalaya a·doko ki·tap pale cha·enggipa manderangni neng·nikanirangko a·dok sorkari agangrikanichi namatchengna nanga ineba KSU dabiangaha.
“NCERT-ni textbook-rangko ra·gataniara namgipa ja·ku de·ani ong·a indiba NCERT-ni textbook-rangko ra·gatanio, manderangni daka rikanirang aro itihasrangkode galchangskana nangja. Ia textbook-rango a·doko songdongenggipa Tribal jatrangni ku·sikrangkoba man·chapna nanga,” ine KSU-ni general secretary Donald V Thabah aganaha.
A·dokni chatro chatrirangna Meghalaya Board of School Education (MBOSE), namgipa curriculum-ko on·na man·jaenga ong·ode NCERT-ni curriculum-ko ra·gaton nambatgen ine adita bilsirangna skang KSU-ni agangipa kattarangko gisik ra·atpilengon, “NCERT-ni textbook-rangko ra·gatanio a·doko songdongenggipa manderangni daka rikani, itihas aro ku·sikrangko watchanggaljana gita curriculum-ko taridapskana nanga,” ine KSU-ni general secretary aganaha.
NCERT-ni textbook-rang, mongsongbate social science aro history subject-rango bang·en dakgualanirangko nikna man·ronga ine janapatengon, Hindi ku·sikkosa Meghalaya a·dokni official language ine janapskaaha indiba Garo aro Khasi ku·sikrangni giminde maming janapanian dongja ine Thabah, suk ong·gijaniko parakataha.
“Ia ki·taprango an·chingni matgrikrangni giminba bang·e segualanirangko nikna man·a. Uni gimin ia ki·taprangko seenggipa aro chapa ka·enggipa manderang, a·dokni gimin aro a·doko songdongenggipa manderangni gimin name sandichenggijasa seaia ine nikatna gita man·a,” ine ua aganaha.
