U·IATTIMGIPAONI
SHILLONG: Tura-oni Dalu-ona dakanggipa ramako apalbatate aro namdapate taridapani kamrang da·o mikkang jadokni gisepon matchotnaba gnang ine official-rang, ka·dongchakenganiko parakataha.
Ia ramako NHIDCL jako ra·e tariengachim aro official-rangni u·iatani gitade, da·o dipet ia ramako tariani 57 percent matchotmanaha.
Ia kilometre 51 ong·gipa 2-lane ramako tarina gong kror 358.65 korosko hisapsomanahachim aro da·o dipet ia ramako tarianio 56 percent-ni gita koros ong·engaha ineba official-rang aganaha.
Ia ramako tarina gita 2018 bilsion contractor-na pakwatmanahachim aro ia ramako re·baenggipa 2024 bilsini June 30 tariko matchotna ka·dongengachim.
Indake ong·engon, Nongstoin-Rambrai-Kyrshai ramaoni Meghalaya-Assam simaona rama tariani kamrang da·o 61 percent matchotaha aro ia kamrangko re·baenggipa bilsini May 30 tarikni gisepo matchotna ka·dongenga ineba official-rang parakataha.
Ia ramako tarina gong kror 155.54 tangkarangko chame on·manahachim aro kamrangko re·anggipa bilsiosan a·bachengatahachim.
