U·IATTIMGIPAONI
SHILLONG: Meghalaya Residents Safety & Security (Amendment) Bill (MRSSAB)-o chu·onggijanirangko namatna gita 2016 bilsio ra·gatgipa MRSSA-kon ra·pilchina gita Khasi Students Union (KSU), a·dok sorkario dabiangaha.
KSU-ni general secretary Donald V Thabah-ni parakatani gitade, MRSSA-ko taridapanio batesa neng·nikanirangko chagrongna nangengani gimin uamang gitcham MRSSA-onan re·angpilchina nangnikenga.
“Maini gimin MRSSA-ko sorkari taridapenga chinga ma·sija indiba iako taridapanichi batesa neng·nikanirangko chagrongna nangskaenga. Uni gimin nanganirangko ta·raken taridapchina chinga sorkariko nangnikenga aro man·a ong·ode skango ra·gatgimin MRSSA-onan re·angpilchina chinga nangnikenga,” ine Thabah aganaha.
MRSSAB-ko ra·gatanio somoi nangchaengani gimin aro Inner Line Permit (ILP)-ko ra·gatchina dabienggipani bidingoba da·onan sorkari aganchakaniko on·kujaengani gimin KSU-ni general secretary, ia kattarangko aganaha.
“MRSSA 2016-ko MRSSAB-ona taridapanio clause mingsako ra·chapaha, jean Home Affairs Ministry-ni gisikkoba salaha. Mitam manderang iani bidingo High Court-oba ijahar ka·aha. MRSSAB-ko Home Affairs Ministry-na u·iatani ja·mansa ia Bill-ko ministry ra·chakkujaenga,” ine Thabah aganaha.
Thabah-ni parakatani gitade, 2016 bilsio MRSSA-ko ra·gatani somoiode ma·mong sorkariko man·chape darangba iani bidingo jajrengchakani dongkujachim.
ILP-na dabianiko chu·sokatchina aro MRSSAB-ko ra·chakchina uamang nangnikenga ineba KSU-ni general secretary parakataha.