U·IATTIMGIPAONI
SHILLONG: Khasirangoni poedo serakgipa U Soso Tham-ni chang 83-gipa siani salko Sombar salo, Khasi aro Jaintia Hills a·jani dingtang dingtang biaprango gisik ra·e maniangtokaha.
Ia salko Khasi Students Union (KSU) dolni gita North Eastern Hill University (NEHU) Shillong Campus-o maniangaha aro ia manianio KSU-ni membor-rang, dingtangmancha U Soso Tham-ni namgipa kamrangko gisik ra·e una mande ra·pilskaaniko dakangaha.
East Jaintia Hills a·jaoba U Soso Tham-ni chang 83-gipa siani salko, Khasi Authors Society (KAS) Khliehriat Unit, Jaintia Eastern College-ni Khasi Department baksa nangrime, Khliehriat-o donggipa Jaintia Eastern College-o manidilangaha aro ia manianio, a·dokni Rajya Sabha MP WR Kharlukhi baksana a·dokni Cabinet Minister Kyrmen Shylla-ba dongpae bak ra·angaha.
Ia salko manianio a·dokni Rajya Sabha MP WR Kharlukhi, tom·anio bak ra·giparangna aganprakangengon, U Soso Tham-ni seanggipa poedorangko gisik ra·atpilangenba, uni poedorangchi ua bang·a manderangnan didianirangko on·aha ine parakataha.
Ia tom·anio a·dokni Cabinet Minister Kyrmen Shylla-ba jinmana aganprakangengon, U Soso Tham-ni segipa poedorangko ua uni skul poraiengmiting somoirangonin poraimanaha aro uni poedorangchi bang·en didianirangko man·aha ine parakataha.
U Soso Tham, 1873 bilsio kangalbegipa nokdangosa atchigenchimoba, uni tikkele poraianichi ua ja·mano high skulo skigipani kamko ka·angaha aro Khasirangni sea jotanioba niksenggipa ong·angahachim.
