NGH-o Farmers’ Day-ko manianga
U·IATTIMGIPAONI
RESUBELPARA: Meghalaya a·doko game ge·e cha·giparangko mande ra·pilskana gita a·dok sorkarini manienggipa Farmers Day-ko North Garo Hills a·jaoba Sombar salo, Resubelpara-ni Jonglapara songo maniangaha.
Ia Farmers Day-ko December-ni 4 tarikon a·dok sorkari, manina gita salko tik ka·somanahachim indiba unsalo, a·dokni Chief Minister Conrad K Sangma, gipin kamrango jakchakjahani gimin ia salko Sombar salosa, Resubelpara-o maniangskaaha.
Ia salko manianio a·dokni Chief Minister baksana PHE Minister Marcuise Marak, Meghalaya Assembly-ni Deputy Speaker Timothy D Shira, Bajengdoba MLA Pongseng Marak, Kharkutta MLA Rupert Momin, GHADC-o nominate ka·ako man·gipa MDC Aldo Sangma aro gipin dilgiparangba dongpae bak ra·angtokaha.
Ia Farmers Day-ko manianio a·dokni Chief Minister, jinmana aganprakangengon, a·doko songdongenggipa manderangoni 80 percent-de game ge·e cha·giparangan ong·e, a·dokna cha·anirangko chu·onga gita man·e on·na gita rakbee kamrangko ka·engani gimin a·doko game ge·e cha·giparangko mande ra·pilskana gita ia salko manina tik ka·aha ine parakataha.
“Sorkarini iako dakani miksonganiara, a·dok sorkarini a·bachengatgipa kamrang aro a·doko songdongenggipa mande sakantini bakrimanichi a·dokni economy-ko gong kror 45,000-oniko billion dollar 10-ona ra·dona gita miksonganian ong·enga. Ia jumangko an·ching, game ge·e cha·gipa mande sakantini, producer group-rangni, bading chiwalgiparangni aro sorkarini ra·gatgipa PRIME, Mission Mode program, CM-Elevate program aro uandakgipa program-rangchi chadamberangni kamrangko jakkale chu·sokgipa ong·atna man·gen,” ine Sangma aganaha.
Ia tom·anio ua Garo Hills-ni dam 17 food processing unit-rangkoba oprake on·angengon, re·baenggipa jarango dam 100 processing unit-rangko kulidape on·angkugen ineba parakataha.
Chief Minister-ni aganani gitade, ia processing unit-rangchi joltango game ge·e man·gipa me·su samjak aro bolam biterangoniko cha·anirangko tarina aro bading chiwalanirangko tang·doatna dakchakanirangko man·gnok.
Ia program-ko ong·atanio ua, FOCUS, Working Capital loan-rang, YESS aro Payment on Eco-System (PES)-na gong kror 2.5-ni cheque-rangkoba dingtang dingtang dolrangna suale on·angjolaha.
