U·IATTIMGIPAONI
SHILLONG: Re·baenggipa 2024 bilsini Lok Sabha election-o Tura parliamentary constituency-oni susana gita Gambegre-ni MLA Saleng A Sangma aro Williamnagar-ni gitcham MLA Deborah C Marak, Congress dolni tikitna susaenga.
Iani bidingo kobor ra·timgipa manderang baksa agangrikengon, Tura parliamentary seat-oni susana gita sakbri ba sakbonga manderang Congress dolni tikitna agangrikaha indiba da·o dipet dorgastorangko okamkujaenga ine Sombar salo, Congress Legislature Party (CLP)-ni dilgipa Ronnie V Lyngdoh parakataha.
Congress dolni tikitna susaenggiparangoni Saleng A Sangma-ba saksa ong·a ine janapatengon, “Re·baenggipa bilsini Lok Sabha election-o Saleng-ba susana an·tangni gisik nanganiko mesokmanaha,” ine Lyngdoh parakataha.
Lyngdoh-ni aganani gitade, Williamnagar-ni gitcham MLA aro a·dokni gitcham Cabinet Minister Deborah C Marak-ba ia MP election-o susana sikenganiko mesokmanahani gimin da·o dipet Congress dolni tikitko on·ani bidingo name tik ka·kujaenga.
“High Command-oni ge·etaniko man·soahaon chinga dorgastorangko okamgnok,” ine CLP-ni dilgipa aganaha.
Congress dolni candidate-ko seokna skang pilakni gitan candidate-rangko nichenggen ineba ua talataniko on·angaha.
Da·o ong·enggipa Tura-ni MP aro NPP-ni candidate Agatha K Sangma-ni bidingo sing·anina aganchakaniko on·angengon, “Ua (Agatha) manderangni nangnikani gita kamrangko ka·ama ka·ja ukode Garo Hills-ni manderangsa da·o election-ni somoio mesokgen,” ine Lyngdoh parakataha.
Shillong parliamentary seat-ni gimin janapatskaengon, ia changba Shillong seat-ko Congress chepiltaigen ine Congress dolni dilgipa, an·tangni ka·dongchakenganiko parakataha.
Da·o dipet Meghalaya Pradesh Congress Committee (MPCC)-ni president Vincent H Pala-an Shillong Lok Sabha constituency-ni MP ong·engachim ine nikna man·a.
Indake ong·engon, apsan bilsion ong·atna sienggipa KHADC aro JHADC election-naba Congress dol tarisamsoengaha ine Lyngdoh parakataha.
“Congress dolna Lok Sabha aro district council election minggnian namen gamchatgiparang ong·a. AICC-oni u·iataniko man·soahaon chinga KHADC aro JHADC election-naba dorgastorangko okamgnok,” ine ua aganaha.
Lok Sabha aro district council election minggninan Congress dol, chegipa candidate-rangkosa seokgen ineba Lyngdoh parakataha.
