U·IATTIMGIPAONI
TURA: Meghalaya a·doko bang·a manderangan sorkarini on·enggipa dingtang dingtang scheme-ni namgnirangko man·tokkujaengani a·sel neng·nikanirangko chagrongna nangtokenga ine Sombar salo Meghalaya Trinamool Congress (TMC)-ni chadambe dolko dilenggipa Richard Marak parakatenba, manderangni man·gniko da·o Krismasna skangan je cholchiba sokate on·china a·dok aro ma·mong sorkarirangko didiataha.
Marak-ni parakatani gitade, sorkarini dingtang dingtang scheme-rang, jekai MGNREGA, PMAY, PM-KISAN aro uandakgipa dingtang dingtang scheme-rangko manderangona sokate on·jaengani gimin a·doko NPP-chi dilenggipa MDA sorkari aro ma·mongo BJP-chi dilenggipa NDA sorkari dolgnian dai nanggiparang ong·enga maina scheme-rangko manderangona sokate on·ani kamara a·dok aro ma·mong sorkari dolgnini daitoan ong·achim.
“Ian a·dok sorkarini kam cholijaengani a·selma ma ma·mong sorkarini nirokna gisik nanggijani a·selma, iako sing·na gita nangchongmotenga. Sorkariko chalaiengon, manderangna namgnirangko sokate on·aniara uamangni daitoan ong·achim. Ia scheme-rangara sorkarini ka·sae on·enggipa namgnirang ong·ja indiba manderangni neng·e kamaigipa tangka paisarangan ong·ani gimin manderangni man·na nangenggipa tangka paisarangko da·o Krismasna skangan je cholchiba on·na nangchongmota,” ine TMC-ni chadambe dolko dilenggipa Richard Marak parakataha.
Dolsa dolgipinko matnanggrike dongjachina a·dok aro ma·mong sorkarirangko didiatengon, “Manderang an·tangtangni man·gnirangko ta·raken man·na nangchongmota aro iano dolgni sorkarirangan dai nanggiparang ong·e, ia neng·nikanikoba dolgnian namatna nangchongmota,” ine Marak parakataha.
 |
ReplyForward
|