U·IATTIMGIPAONI
TURA: 2020 bilsini GHADC election-o BJP-ni candidate ong·e seokako man·enba ja·mano Trinamool Congress (TMC)-o napanggipa Betasing MDC Sanjay Koch, an·tangna kam ka·enggipa sak 200 manderang baksa National People’s Party (NPP)-o napangskaaha.
Koch-ko Tura-ni MP Agatha K Sangma, a·dokni PHE Minister Marcuise N Marak aro dingtang dingtang dilgiparang NPP-ona rimchaksoaha.
GHADC-o Opposition dol ong·e kamko ka·enggipa TMC-ni MDC Sanjay Koch-ba da·o NPP-o napangahani gimin GHADC-o NPP-ni MDC-rang gimik sak 17 gapengaha.
West Garo Hills NPP-ni general secretary Mathias N Marak-ni parakatani gitade, Garo Hills-o da·o NPP bilakbatrorobaengahani gimin re·baenggipa 2024 bilsini Lok Sabha election-oba bang·bata vote-rangchi gipin candidate-rangko chena ka·dongenga.
“Skangode South West Garo Hills a·jaba a·dokni gitcham chief minister Dr Mukul Sangma-ni bilake rim·gipa a·ja gitasa ong·achim indiba da·o uni bilrang ka·sinsin be·roroangengaha aro bang·a dilgiparangan NPP-onasa re·batokengaha. Garo Hills-o ong·enga obostarangko nigenchimode re·baenggipa bilsini Lok Sabha election-o NPP, bang·bata vote-rangchi chena man·gnok,” ine Marak parakataha.
BJP-ni gitcham state vice president Bakul Ch Hajong, jean 2023 bilsini Assembly election-o Rajabala constituency-o susae chu·sokgipa ong·na man·jahachim, uaba ia 2023 bilsini September 16 tariko NPP-o napangahachim.