U·IATTIMGIPAONI
SHILLONG: Meghalaya a·doko Congress dolko bilakpiltaina gita doloni ong·kate katgipa gitcham membor-rangko doltangona rimbapilna jotton ka·enga ine Congress Legislature Party (CLP) aro Opposition dolni dilgipa Ronnie V Lyngdoh parakataha.
“Congress dolo chinga pilakan ku·cholsan ong·giparang ong·ani gimin chingni gitcham membor-rangkoba chinga rimbapilna nangnikgenchim,” ine Lyngdoh, kobor ra·timgiparangna aganaha.
Congress doloni ong·kate katgipa gitcham membor-rang, jemangan doltangona re·bapilna sikengachim, uamang pilakkon Congress dolni dilgiparang rimchaksona kusi ong·aigen ineba ua aganaha.
A·dokni gitcham chief minister aro Congress dolni gitcham dilgipa Mukul Sangma-ni bidingo sing·anina aganchakaniko on·angengon, Mukul Sangma baksa agangrikani bidingo uamang Congress dolni working president Deborah Marak-ni report-na sengengkua ine MPCC-ni president parakataha.
“Mukul Sangma-ni Congress dolona re·bapilani giminde anga mamingkoba ma·sikuja maina ia kamko Deborah an·tangsa jako ra·aha. Mukul Sangma baksa agangrikani bidingo Deborah an·tangni report-ko Congress dolni dilgiparangna on·eani ja·mansa iani bidingo ma·sina man·gen,” ine Lyngdoh aganaha.
2022 bilsini November jao, Mukul Sangma aro gipin sak 12 MLA-rang, 2023 bilsini Assembly election-na skang Congress dolko wate All India Trinamool Congress (AITC)-o napangskaahachim ine nikna man·a.
Ia dilgiparangni wate katangani ja·man Meghalaya a·doko Congress dol bilgri ong·a gita ong·aiahachim.