U·IATTIMGIPAONI
SHILLONG: Meghalaya a·dokni deficit skulrango skigiparangni dingtang dingtang dabianirangko chu·sokate on·na gita cholrangko sandina, a·dokni Education Minister Rakkam A Sangma ku·rachakaniko on·ataha.
Meghalaya a·dokni deficit skulrango skigiparangnaba pension baksana death-cum-retirement gratuity (DCRG)-ko sorkario kam ka·giparang baksa apsan daken on·china dabitokengachim ine nikna man·a.
Deficit skulrango skigiparangni iandakgipa dabianirangko chu·sokate on·na ua cholrangko nigen ine ku·rachakaniko on·angengon, “Ia dabianirangko chu·sokatna gita sorkari ru·uta somoirangna skangonin cholrangko nienga aro da·oba chinga cholrangko sandiengkua. Skigiparangna pension aro DCRG-ko sorkario kam ka·giparang baksa apsan dake on·na anga jotton ka·gen aro anga bebera·a sorkari cholko man·telgen,” ine Sangma parakataha.
Deficit skulrango skigiparangni dabianirangko chu·sokatna gita sorkari cholrangko sandigen ine ku·rachakaniko on·angengon, da·o dipet ua dikdiksa somoirangnasan Education Minister ong·e kamko ka·na cholko man·engkua ine Sangma parakataha.
“Ia kamrangni bidingo chanchirimna gita Education Commission tariengaha aro chingaba commission-ni agan-ku·pattianirangna senge dongenga. Je ku·pattianirangkon commission-ni gita sorkarina on·gen, chinga uarangko kusi ong·en ra·chakgen aro cholrangko sandigen,” ine Education Minister aganaha.
Kamoni neng·tanggimin skigiparangna pension aro death-cum-retirement gratuity (DCRG)-ko bariatchina gita Meghalaya Retired Deficit Teachers Association (MRDTA), a·dok sorkario dabiengachim ine nikna man·a.
MRDTA-ni president ED Nongsiang-ni parakatani gitade, 2017 bilsini January 1 tarikoni 2022 bilsini March 31 tarikni gisepo kamoni neng·takanggipa deficit skigiparangna sorkari, DCRG-ko bariatna tik ka·ahaoba 2017 bilsina skang aro 2022 bilsini ja·man kamoni neng·takangenggipa skigiparangnade DCRG-ko bariatna tik ka·kujaengachim.
