U·IATTIMGIPAONI
TURA: Jisu Kristoni atchiani salko gisik ra·e a·gilsak gimik manitokengon ia salko Garo Hills-oba tom·tombee aro ka·srokbee manderang maniangtokaha.
Ia Krismasni salko nichaksona gita Garo Hills-ni pilak biaprangon December 24 tarik walonin giljarangko ka·e Isolko olakkiangaha aro uandaken December-ni 25 tarik pring aro attamoba dingtang dingtang mondolirang giljarangko ka·e Isolko olakkiangaha.
December-ni 25 tarik pringo Garo Hills gimikon Isolko olakkina gita giljarangko ka·angaha aro gilja jokani ja·mano bang·bata mondoli aro gittimrangon jinma kusi ong·e cha·rim ringrimanirangkoba nikna man·angaha.
December-ni 25 tariko jinma cha·rim ringrimna choljokgijagipa manderangba dingtang salona somoiko donatskae, gittimtangtango ba songtangtango apsan daken jinma tom·e cha·rim ringrimanirangko dakangtokaha.
Batanggimin bilsirango dakronga gitan ia bilsioba dama doke aro git wate chrok mesaanirangko Garo Hills gimikon nikna gita man·angaha aro ramarango manderangni git ring·e aro git wate re·ramanirangkoba nikna man·aha.
Pangna bilsian Krismasni somoirango, churing chupeke garirangko salanichi ramarango a·sel ong·anirangko nikna man·rongani gimin ia changoba police-rang, badiaba badiaba biaprango nirok sandianirangko dakangaha aro uandaken bang·bata biaprangon iandake a·sel ong·anirangko champengna gita man·aha.
Re·baenggipa January jani 15 tarikoni 21 tarikona Meghalaya Games-ko Tura jillao sokachakna siengani gimin Tura jillani dingtang dingtang gittimrango tarisamsoani bak gita light-rangchi nitobee teng·atanirangko aro rongtal an·talalanirangkoba ia Krismaso nikna gita man·aha.
