U·IATTIMGIPAONI
SHILLONG: Ma·mong sorkarini ra·gate on·gipa dingtang dingtang scheme aro program-rangko a·dok sorkari name chu·sokate on·jaha ine a·dokni BJP matnangatenba, ia scheme-rangni bidingo RTI ka·enba, jinmana parakna gita tik ka·angaha.
BJP-ni state vice president aro Tura-ni MDC Bernard N Marak-ni parakatani gitade, ma·mong sorkarini ra·gatgipa scheme-rangni bidingo BJP, am·sandianirangko dakenga aro songni nokni manderang baksa agangrikenga.
“Ma·mong sorkarini ra·gate on·gipa scheme-rangko a·dok sorkari, songni nokni manderangona sokate on·jaenga ine matnanganirangko man·soahani gimin chinga iani bidingo RTI ka·e am·sandina sienga aro aganchakanirangko man·soahaon iako chinga ma·mong sorkarina u·iatskagen,” ine Marak aganaha.
Ma·mong sorkarini ra·gatgipa scheme-rangni bidingo a·dok sorkari aro dingtang dingtang department-rang maiko aganchaka, uko nina gita BJP, Bilsi Gital maniani ja·man bakan RTI ka·gen ineba ua parakataha.
Meghalaya a·doko JJM, AAY, PMGSY aro uandakgipa scheme-ni kamrangko BJP, am·sandienga ine janapatengon, “Department-rangni RTI-na aganchakanirangko chinga tosusae, ja·mano nanga gita ja·kurangko de·china ma·mong sorkarinaba report-ko on·atgen,” ine BJP-ni state vice president parakataha.
Marak-ni aganani gitade, songrango dingtang dingtang project-rangko matchotaha ine a·dok sorkari lekkarango see on·engoba biapona re·ange nigenchimode kamrang matchotsranga ong·kujaengachim.
“Kamrangko re·ange nigenchimode, PMGSY, AAY aro Swachh Bharat-ni ning·o songni manderangna on·gipa toilet-rangkoba niam gita ka·jaha ine nikna man·gen. Uni gimin ia pilak kamrangni bidingon chinga RTI ka·enba, ja·mano ma·mong sorkarina report-ko on·atgen,” ine Marak aganaha.
Ma·mong sorkarini ra·gate on·gipa dingtang dingtang scheme-rangko a·dok sorkari name chu·sokatja ine BJP dolni matnanganiko adita salrangna skangsan NPP jegalatahachim ine nikna man·a.
“Badia project-rangko name chu·sokatja ine aganenga chingna aganbo, jedakode chinga kamrangko nambatatna man·gen. Kakketko agangenchimode scheme-rangko chu·sokatanio maming olgrokanian dongjachim,” ine a·dokni Cabinet Minister aro NPP-ni working president Marcuise Marak parakatahachim.
Sakki gri kamrangko chu·sokatja ine matnangaianikode darangba bebera·na man·jawa ine janapatengon, “Garo Hills-ona re·ange nigenchimode na·simang ma·mong sorkarini bang·a project-rangkon nikna man·gen,” ine NPP-ni dilgipa a·kangaha.
