U·IATTIMGIPAONI
SHILLONG: Mongolbar salo, Rotary Club Jowai (RCJ)-ni membor-rang, West Jaintia Hills a·jani Sabah Muswang-o donggipa Halfway Home-o ma·chakenggipa manderangna kombolrangko suale on·angaha.
Ia Halfway Home-ara, gisikni gita tik ong·gijagipa manderangko ma·chake, sanna bananiko on·enggipa nok ong·a aro ia nokko Jowai-ni SURE NGO chalaienga.
Ia program-ko ong·atanio Society for Urban & Rural Empowerment (SURE)-ni secretary Dr HH Morhmen, jinmana aganprakangengon, SURE dolni bidingo agan-talataniko on·angenba, ia dolni gita ka·enggipa kamrangni bidingo jinmana talate on·angaha.
SURE dolni jako ra·e ka·enggipa mingdol project-rangoni ia Halfway Home project-ko chalaianian rakbatsranggipa kam ong·enga ine janapatengon, SURE aro Rotary Club dolgnian, dakchakanirangko nangenggipa manderangna kamko ka·enggipa dolrang ong·a ine Dr Morhmen parakataha.
Ia tom·anio RCJ-ni president Rotarian SK Lato-ba jinmana aganprakangengon, gisikni gita saenggipa manderangna kamrangko ka·engani gimin SURE dolko mittelpilangenba, Halfway Home-o dongenggipa manderangna dakchakanirangko on·na man·ahani gimin an·tangni kusi ong·aniko parakataha.
