Veer Bal Diwas aro Good Governance Day-ko BJP manianga
U·IATTIMGIPAONI
SHILLONG: December-ni 26 tarik Mongolbar salo, Meghalaya a·dokni BJP dol, Guru Govind Singh-ni depante Zorawar Singh aro Fateh Singh-ni on·kanganiko gisik ra·na gita ‘Veer Bal Diwas’ aro a·songni gitcham Prime Minister Atal Bihari Vajpayee-ni atchiani salko maniani bak gita ‘Good Governance Day’-koba maniangaha.
Veer Bal Diwas-ko BJP Meghalaya Mahila Morcha aro BJP-ni chadambe dol BJYM nangrime ong·ataha aro ia program-ko ong·atanio, BJP Mahila Morcha-ni state president Sukhi Pariat, jinmana aganprakangengon, ia Veer Bal Diwas-ko maniengon, pagitcham ma·gitchamrangni kamrangna mittelpile mikkangchina ka·dongsoani somoi ong·enga ine parakangaha.
Prime Minister Narendra Modi-ni dilanichi India a·songni dal·roroaniko nikna man·engaha ine janapatengon, bilakgipa aro namroro silrorogipa India a·songko ong·atani pilakan on·gilna nanga ine Pariat aganaha.
Ia tom·anio BJYM-ni president Mewakar Lyngdoh-ba jinmana aganprakangengon, pekatgipa samrangko jakkalanichi ong·gija ramao dilsretangako man·gipa chadamberangko namgipa ramaona re·bapilchina didianiko on·angaha.
Ia program matchotani ja·man dingtangmancha bi·sarangko Mahila Morcha-ni membor-rang, Gurudwara-ko nina gita rimangaha.
Good Governance Day-ko manianio a·dokni Cabinet Minister AL Hek, BJP-ni state spokesperson Mariahom Kharkrang, National Council-ni membor David Kharsati aro Dr Fenella Lyngdoh Nonglait-ba bakko ra·angskaaha.
Ia manianio BJP Minister AL Hek, jinmana aganprakengon, G-20 theme-ni gimin gisik ra·atpilaniko on·angenba, mande sakantikon nokdangni mande gita chane, mandeni aro songsalni namgnina kamko ka·china gita tom·anio bak ra·gipa mande sakantikon didiangaha.
