TURA: January-ni 2 tarik pringwalni 1:40 bajimango, ML-08F 4659 motorcycle bolsa, NL-01AC 5914 truck gariko Tura-ni DC Park sambao overtake ka·engmiting somoio, mikkangchini re·baskaenggipa AS-02L 8693 Alto gari baksa chatinggrike a·sel ong·aha aro ia a·sel ong·anio motorcycle-ko salenggipa mande siangna gita nangaha.
Police-rangni kobor on·ani gitade, sianggipa mandeara South West Garo Hills a·jao donggipa Dombagre Mellim songoni Grandstone R Marak ong·achim aro ua somoio ua, Kerapara songni saksa Kiang Ch Momin minggipa mande baksa Jangga jolchipakni Tura Bazar-chipak re·angengachim.
Tura DC Park aro PWD (Building) office-ni gisepo donggipa ramaona sokon, ia motorcycle-ko salenggipa mande ta·rake salenba, uamangni mikkango re·enggipa truck gariko ‘overtake’ ka·na jotton ka·ahachim indiba ua somoio uamang, mikkangchini re·baskaenggipa Alto gari baksa chatinggrike a·sel ong·aha. Alto gari baksa chatingani ja·man uamangni motorcycle, ua biapon ga·akaha indiba rasong gribee motorcycle-ko salgipa mande, truck gari ning·chi tang·napangenba truck gari ki·sango donggipa chakkachi saldapako man·aha.
Adita salrangna skangsan, Krismasko maniani somoioba Tura-ni Dakkopgre jolo donggipa TV Tower ramao, gari bolgni chatinggrike a·sel ong·aha aro gari bolgni chatinggrike a·sel ong·anio adita sak manderang saknaanirangko man·ahachim.
Koborko on·ani gitade, ua somoio ML-05H 8600 Alto gariko salenggipa mande, nangana batpile ta·rakdugae salenba, DL-7CJ 1770 Hyundai i-10 gariko su·gakeaha aro Hyundai gario gadoenggipa adita sak bi·sarang saknaanirangko man·na nangahachim.
