SHILLONG: Budbar salo, Promotion of Industry & Internal Trade Department-ni gita ODOP Awards 2023-ko New Delhi-ni Pragati Maidan-o ong·atanio, Meghalaya a·dok gittamgipa biapko man·aha.
Ia chu·sokaniko man·anichi One District One Product (ODOP)-ni kamrango Meghalaya a·dokba on·kange kam ka·aniko mesokani ong·aha.
Ia Aatmanirbhar Bharat Utsav aro National ODOP Awards-ko India a·songni External Affairs Minister Dr S Jaishankar a·bachengate on·aha aro ian ODOP-ni kamrangchi Aatmanirbhar Bharat-ni miksonganirangko dingtang dingtang a·dokrangni chu·sokatna kam ka·aniko manianiba ong·a.
ODOP Awards-ko on·anio gittamgipa biapko man·ahani gimin an·tangni kusi ong·aniko parakatengon, “Ia award ba boksisko man·aniara a·doko game ge·e cha·enggipa aro jakni kamrangko changgipa sapgipa manderangna didiani ong·a. Chingni kamrangna mittelpilani chin gita ia boksisko on·ahani gimin Meghalaya sorkari, Promotion of Industry & Internal Trade Department aro Ministry of Commerce-ko mittelpilna ska,” ine Meghalaya a·dokni Chief Minister Conrad K Sangma parakataha.