TURA: North Garo Hills a·jani Adokgre jolrango Jio mobile network-ko name man·jaengani a·sel Jio network-ko jakkalenggipa manderang neng·nikanirangko chagrongna nangtokenga ine A·chik Holistic Awakening Movement (AHAM) Adokgre unit, Jio mobile company-ni director-na sedoatenba, ia jolrango Jio network-ko namdapatchina didiataha.
AHAM Adokgre unit-ni parakatani gitade, ia jolrango Jio network-ko name man·jaengani gimin adita salrangna skang AHAM-ni membor-rang, Jio tower-ko nirokenggipa mandeko grongenba sing·sandion, ia tower-ni generator-ko tarikujaengani a·sel network-ko name man·jaenga ine talataniko on·angaha.
Iani bidingo AHAM-ni membor-rang Jio company-ni official-rangnaba u·iatahachim indiba da·onan ia tower-ni generator-ko tarie on·kujaenga ine AHAM Adokgre unit-ni dilgiparang parakataha.
Adokgre jolrango Jio network-ko name man·jaengani a·sel Jio network-ko jakkalenggipa manderang neng·nikanirangko chagrongna nangtokenga ine janapatengon, iani bidingo ta·raken kamrangko nirokatchina gita AHAM Adokgre unit-ni dilgiparang, Jio company-ni director-ko didiataha.
