SHILLONG: Da·o adita jarangni gisepon Lok Sabha election-ko ong·atna siengahaoba, Meghalaya a·dokni Shillong aro Tura parliamentary constituency-rango susaani bidingo a·dokni dilgiparang baksa ma·mongo Trinamool Congress (TMC)-ko dilenggiparang maming agangrikanirang dongkujaengani gimin election-o susana gita gisik nangbrejaenga ine nikatna man·a.
Lok Sabha election-na NPP, Congress aro gipin national party-rangko man·chape joltangni political dolrangba kamrangko ka·chichasotokengaha indiba TMC dolni gitade da·onan maming agangrikanirang aro election-o susana gita chanchisamsoanirang dongskakujaengachim ine nikna man·a.
TMC ning·o donggipa mitam membor-rangni u·iatani gitade, TMC-ni state president Charles Pyngrope aro TMC Parliamentary Party-ni dilgipa Mukul Sangma sakgnian ia Lok Sabha election-na maming gisik nanganirangko mesokkujaenga maina ma·mongni dilgiparangan, uamang baksa ia election-ni bidingo agangrikaba dongkujaengachim.
Meghalaya a·doko TMC-ni ong·enggipa obostarangko niatgenchimode, ia Lok Sabha election-o uamang, a·dokni damgni constituency-rango candidate-rangko susaatjanaba gnang ine nikatna man·enga.
Koborrangko man·soani gitade, Meghalaya a·doko TMC dol, BJP baksa bakrime susana miksonganirang dongachim indiba iandakgipa koborrangko Pyngrope aro Sangma sakgnian jegalatskaahachim.
Mukul Sangma aro TMC-ni adita sak dilgiparang, BJP-o bakrimna miksongenga ine kobor on·aniko BJP-ni dilgiparangde jegalaba ong·ja aro ra·chakaba ong·ja dake dongskaengachim.
Adita jarangna skangsan, TMC-ni dilgipa Mukul Sangma, New Delhi-o BJP-ni dilgiparangko grongenba, TMC-ni MLA-rangko BJP baksa bakrimatani bidingo agangrikaha ine badiaba badiaba songbadrango seanirangko niknaba man·ahachim.
Ma·mongo Trinamool Congress (TMC)-ko dilenggipa manderangni kamo kusi ong·jaengani gimin Mukul Sangma, TMC-oni ong·katna miksongenga ineba koborko man·soaha.