SHILLONG: Shillong songjinmaoni Umroi-o donggipa Shillong airport-ona rama gita para salgipa gari gorarango re·ruraanio parako bate ra·engani gimin ia Shillong airport-oni dingtang dingtang biaprangona sildorengo bilruraanion korosrang komibatpilenga.
Koborko on·ani gitade, Shillong airport-oni Dimapur-ona sildorengo songreanio gong 1500-oni gong 1800-mangsan ong·aia indiba Shillong airport-oni Shillong songjinmaona garirangko para ra·e re·genchimode gong 1500-oni gong 3000-mang ong·pile parako ra·skaenga.
Da·o dipet Shillong songjinmaoni Shillong airport-ona manderangko salruragipa bus garirang dongkuja aro Shillong songjinmao taxi salgipa manderang jegaltokengani gimin a·dok sorkariba, Shillong songjinmaoni Umroi-o donggipa Shillong airport-ona bus gari salruraaniko a·bachengatkujaenga.
Shillong songjinmaoni Shillong airport-ona manderangko salruragipa bus garirangko a·bachengatna gita batanggimin somoirango airport-ni official-rang, a·dok sorkari baksa baditaba chang tom·e agangrikahachim indiba da·alona kingkingan Shillong airport-ona manderangko salruragipa bus garirangko a·bachengatna man·kujaenga ine kobor on·timgiparang u·iataha.
Shillong songjinmaoni airport-ona taxi parako tik ka·e on·china gitaba airport-ni official-rang, a·dok sorkariko u·iatmanahachim indiba da·onan taxi pararangko tik ka·e on·na man·kujaenga.
Shillong airport-ara Shillong songjinmaoni kilometre 27-mang chel·grika aro da·o dipet airport-ona salruragipa bus garirang dongkujaengani gimin aro taxi-ni pararang rakdugaengani gimin joltangni manderangde airport-ona re·rurana gita garitangtangkon jakkalna nangnikbattokskaenga.
