TURA: Re·baenggipa January 15 aro 16 tarikrango a·songni President Droupadi Murmu, Tura-ona re·baengani gimin Tura jillani ramasamrango gari donaniko, West Garo Hills a·jani Superintendent of Police (SP) champengataha.
Meghalaya a·dokona re·baanio a·songni President Droupadi Murmu, skanggipa January-ni 15 tariko Tura-o ong·atenggipa Meghalaya Games-ko do·ga oe on·anggen aro salgipin, chong·motan January-ni 16 tariko, a·dokni skotong Shillong songjinmaona re·ange, Shillong Ropeway project-na pangchakaniko songe on·angskana siengachim.
A·songni President re·baengani gimin Tura aro Shillong songjinmarango police-rangni chel·chakanirangkoba baridapataha.
Koborko on·ani gitade, President-ni a·dokona re·baanio nanga gita chel·chakanirangko on·na sorkari, dolsku paramilitary force ba ma·mongni sipai dolrangko a·dokona bi·dapataha.