TURA: Meghalaya a·dokni manderang dingtanganiko nangniktokengahani gimin ia chang Lok Sabha election-o Congress dol, Meghalaya a·dokni Shillong aro Tura Lok Sabha seat damgnikon cheani cholrang donga ine Sombar salo, Meghalaya Pradesh Congress Committee (MPCC)-ni working president aro Williamnagar-ni gitcham MLA Deborah C Marak parakataha.
Meghalaya a·dokni manderang NPP-chi dilenggipa MDA sorkario ka·donge seoktaiahaoba ia sorkari, manderangni nanganirangko chu·sokate on·na man·jaha ineba ua aganaha.
“Manderang an·tangtangni dilgiparangko grongna gita Shillong-ona re·ange salgni salgittam waltuna nangtokenga indiba uamang an·tangtangni dilgiparangko grongna man·jaenga. Ia sorkari, an·tangtangni manderangnasa somoi batpile kam ka·enga indiba sorkarini daitokon gualskaenga. Ian a·dokna namen dukni katta ong·a,” ine Marak aganaha.
Garo Hills-o Congress dolko bilakbatatna nangenga ine janapatengon, East Garo Hills aro South West Garo Hills a·jani DCC aro BCC-rango president aro secretary-rangni kamko ta·raken gapatna nangenga ine MPCC-ni working president aganaha.
“Skanggipa an·chingni dakna nanggni kamde, pilak DCC aro BCC-ni bimingrang baksana booth level worker-rangni bimingrangko watdoatna nangenga maina uamangsa onbatgipa gadango kamrangko ka·dilgipa ong·a. An·chingo somoirang bang·e dongjahani gimin DCC, BCC aro booth level worker-rangni bimingrangko ra·chakna gita ta·raken watatchina anga na·simangko mol·molenga,” ine Marak, Garo Hills-o Congress dolna kam ka·enggipa manderangko didiataha.
Ia bilsini Lok Sabha election-o MPCC-ni working president Deborah Marak-ba Tura Lok Sabha constituency-oni susana gita Congress dolni tikitna susaengachim ine nikna man·a.
