TURA: Meghalaya a·doko manderangni nangchongmotgipa bosturangni dam rakbatengani gimin Gambegre-ni Congress MLA aro Opposition dolni Chief Whip Saleng A Sangma, re·anggipa Sombar salo All India Congress Committee (AICC)-ni North East In-charge Dr Chellakumar-ni Tura-ona re·baani somoio, NPP-chi dilenggipa MDA sorkariko matnangataha.
Sangma-ni aganani gitade, sorkari maming simsak nirokanirang dongjaengani a·selsa nangchongmotgipa bosturangni dam rakbatroroenga indiba manderang, pangnan dokkan dakgiparangkosa iana matnangskaengachim.
“Nangchongmotgipa bosturangni dam rang·san tang·doahaoba Garo Hills-ni manderangde maming jegalanirang dongja, haida Garo Hills-ni manderangde nangana batpile man·e cha·dugaakom. Bijolini kajinako unit-prako gong 2/- ka·e MeECL bariataha aro anga chanchia ia bilsini bon·angachide bang·a manderangan bijolini kajinarangko gamna man·jani a·sel bijolirangko man·tokjanaba dongaha. Indake ong·genchimoba an·ching darangba aro NGO-rang dolsaba iani bidingo ku·rangko on·kujaenga,” ine Saleng aganaha.
“Meghalaya a·doko manderangni nangchongmotgipa ming 22 bosturangko dam bariataha aro ia ming 22 bosturangoni merong, chini, dal aro uandakgipa cha·ani bosturangba ong·a. Iana an·ching dokkan dakgipa manderangkosa matnangskaenga maina an·ching name chanchibewale nigijagiparang ong·a. Bosturangni damkode sorkari bariatenga indiba dormahakode 5th Pay Commission-ni ning·on donkuenga. Gipin biaprangode da·o dormahako 7th Pay Commission-nikosa man·tokengaha,” ine Gambegre MLA aganaha.
Congress sorkariko rikna man·rikjahani gimin ua, a·dokni gitcham Chief Minister Dr Mukul Sangma-koba matnangataha.
“Meghalaya a·doko Congress dolko Mukul Sangma cha·bokjagenchimode da·alo Congress-ba sorkariko chalaianio bak ong·genchim. Mukul Sangma aro DD Lapang sakgnikon Congress, a·dokni chief minister ong·atahaoba uamang sakgnian Congress dolko watgale kataha. Anga an·tangde Congress dolna ka·saani giminan ia party-ona re·bapilaha maina a·doko songdongenggipa bang·a manderangni gisikon Congress dolna ka·saani donga. Congress dolni ning·o angna tikitko on·na jechakani somoioba uan Congress dolni jechakanide ong·jachim indiba da·o party-ko watgale katgipa mandesa ong·achim,” ine Saleng aganaha.
