BAGHMARA: Hisapgimin aro see rakkigimin koelarangko, dingtang dingtang koela a·damrangoniko dongimin depot-rangona re·baenggipa January 31 tarikni gisepon salgalchina gita South Garo Hills a·jani Deputy Commissioner, koela nokgiparangna ge·etaniko on·ataha.
Re·anggipa January-ni 5 tariko, video conference gita tom·e chanchirimani somoio Justice Katakey-ni u·iataniko man·ahani gimin ia ge·etaniko South Garo Hills a·jani Deputy Commissioner on·ataha.
Dongimin somoi gita hisapgimin aro see rakkigimin koelarangko depot-rangona salgaljagenchimode koela a·damrango chimonge donenggipa pilak koelarangkon rim·gen ine mikrakataniko on·angengon, rim·gimin koelarangko bilo ong·enggipa official-rang, dingtang dingtang depot-rangona ra·anggen aro ja·mano ia koelarangko Coal India Limited (CIL) gita dakkie galgen ine Deputy Commissioner u·iataha.
Rim·gimin koelarangko dakkie galanio koela nokgiparangna tangka paisarangko gampilskaani dongjawaha ineba South Garo Hills a·jani Deputy Commissioner parakataha.
