SHILLONG: Jal Jeevan Mission (JJM)-ko man·chape dingtang dingtang scheme-rangni bidingo Bharatiya Janata Party (BJP)-ni RTI ka·na agananiara da·o Lok Sabha election dongani gimin agananisan ong·aia ine Meghalaya BJP-ni RTI ka·na ra·bianiko National People’s Party (NPP) ra·chakangaha.
Ma·mong sorkarini ra·gate on·gipa dingtang dingtang scheme aro program-rangko a·dok sorkari name chu·sokate on·jaha ine matnangenba, ia scheme-rangni bidingo RTI ka·e jinmana parakatgen ine adita salrangna skangsan BJP-ni state vice president aro Tura-ni MDC Bernard N Marak aganahachim ine nikna man·a.
Uni iandake ra·biatanina aganchakaniko on·angengon, “Ua RTI ka·aichina chingo maming neng·nikani dongjawa. JJM-o dashboard dongani gimin pilakan iani kamrangko nie ra·na man·aigen. Badia songni gimin ua (Bernard) aganenga? Songrangko aro project-rangko ua mesoke on·china aro maiba chu·sokanirang dongjagenchimode chinga namdapatna man·aigen,” ine NPP-ni spokesperson aro a·dokni PHE Minister Marcuise Marak parakataha.
Ma·mong sorkarini ra·gate on·gipa scheme-rangko a·dok sorkari, songni nokni manderangona sokate on·jaenga ine matnanganirangko man·soahani gimin iani bidingo RTI ka·e am·sandina sienga aro aganchakanirangko man·soahaon iako ma·mong sorkarina u·iatskagen ineba ine Tura-ni BJP MDC aganahachim.
Bernard-ni matnanganirangko jegalatskaengon, “Uni matnanganirangara department-ni bimingko ong·gija dake man·atna miksonganisan ong·aia,” ine PHE Minister parakataha.
Marak-ni aganani gitade, da·o Lok Sabha election dongani giminsa aro NPP-ko ong·gija dake mesokna skanirang dongani giminsa BJP-ni state vice president, NPP-chi dilenggipa MDA sorkarini kosako matnangengachim.
JJM-ni kamrangko chu·sokatanio PHE department namen kamko ka·enga ine janapatengon, “2019 bilsio JJM-ko a·bachengatani somoio songadam nokadamrango te 4500 nokdangrangsan chi pipe-rangko man·engkuachim indiba da·alo an·ching lak 4.73 nokdangrangna chi pipe-rangko sale on·na man·aha. Bakan chinga lak 5 nokdangrangona chi pipe-rangko sokate on·na siengaha aro ian chingnasan ong·aigija a·dok gimiknan dal·begipa chu·sokani ong·enga,” ine PHE Minister aganaha.
