RESUBELPARA: Myanmar (Burma) a·songoniko Bangladesh gita a·dokona gue (supari) badingsrukbaenga ine A·chik Youth Council (AYC)-ni badi ka·doangani ja·man, iani bidingo sandirokaniko dakchina gita North Garo Hills a·jani Deputy Commissioner Kumari Mithali Chandra ge·etangaha.
Bangladesh a·song gita a·dokona gue badingsrukbaenga ine re·anggipa January 4 tariko AYC, North Garo Hills a·jani DC-na badi ka·doangaha aro apsan salon iani bidingo inquiry-ko dakchina DC ge·etaniko on·ataha.
AYC-ni Deputy Commissioner-na badi ka·doangani gitade, gue gran ba suparirangko, Myanmar a·songoniko Bangladesh gita badingsrukbae, Dawki-Nongstoin, Shallang, Songsak-Mendipathar aro Rongjeng-Dainadubi gita ram agita Assam a·dokni Matia-ona salangengachim.
Ia guerangko Assam-ona sokbaani ja·man dingtang dingtang company-rangna palskaenga ineba AYC badi ka·doangahachim.
“Ia badingsrukanio komibeoba bol 12 truck-rang walantian, truck bolprako metric ton 12-mang ong·pile gue granrangko salbarongenga. Myanmar a·songoniko niam gri gue badingsrukbaenganichi India sorkari ba Meghalaya sorkarinade gong·saba kajinako gamskajaenga,” ine AYC-ni secretary Maxbirth G Momin parakataha.
Indake ong·engon, iandake niam gri gue badingsrukani bidingo sandirokaniko dakchina gita North Garo Hills a·jani Deputy Commissioner Mithali, MCS officer Nipon Hajong-na pakwate on·ataha aro ia man·a dipet ta·raken report-ko on·anggen.
Koborko on·ani gitade, da·o North Garo Hills a·jani deputy commissioner-ko kam ra·jitatahani gimin ia kamko North Garo Hills a·jani ADC jako ra·rikskaaha.
