Scholarship-ni gnigipa instalment-ko ma·mong sorkari watata
SHILLONG: Scheduled Tribe (ST) chatro chatrirangna 2022-23 bilsini Post Matric Scholarship-ko man·tokkujaengani a·sel chatro chatrirang neng·nikanirangko chagrongna nangtokengon, ia scholarship-ni gnigipa instalment-ko ma·mong sorkari Sukrobar salo watataha aro ian chatro chatrirangna rang·speaniko ra·baani gita ong·aha.
Iani bidingo kobor ra·timgiparangna u·iataniko on·atengon, Post Matric Scholarship-ni gnigipa instalment-ko India sorkarini Finance Ministry-oniko man·soaha ine Sukrobar salo, a·dokni Education Minister Rakkam A Sangma parakataha.
Scholarship-ni gnigipa instalment-ko man·soahani gimin da·o a·dokni Education department, nanga kamrangko ka·engaha ine janapatengon, chatro chatrirangna scholarship-rangko mikkang antini gisepon on·na man·na gita sorkari jotton ka·enga ine Sangma parakataha.
Meghalaya a·doko post matric scholarship-ko man·enggipa ST chatro chatrirang gimik sak 67,000 donga aro sak 37,000 chatro chatrirangde skanggipa instalment-oniko man·ahani gimin da·o sak 30,000 chatro chatrirang, ia gnigipa instalment-niko man·skagnok.
Education Minister-ni parakatani gitade, Post Matric Scholarship-ni gnigipa instalment-o gimik gong kror 41, lak 25 tangkarangko a·dok sorkari, Finance Ministry-oniko man·soaha.
2022-23 bilsini Post Matric Scholarship-na gnigipa instalment-ko watatahani gimin ma·mong sorkariko mittelpilangengon, ia scholarship-ni tangkarangko an·tangtangni poraiani kamrangnasa jakkalchina aro skatang koros ka·jachina gita Education Minister, chatro chatrirangko didiataha.
2022-23 bilsini Post Matric Scholarship-rangko chatro chatrirang da·onan man·tokkujaengani gimin dingtang dingtang dolrang, a·dok sorkariko matnangtokengachim ine nikna man·a.
