SHILLONG: Ia bilsini Lok Sabha election-o susagenma susajawa a·dokni Trinamool Congress (TMC)-o jajaanirang ong·engon, iani bidingo TMC-ni dilgiparang baksa agangrikna gita TMC Meghalaya-ni dilgiparang, mikkang antio Kolkata-ona re·anggen.
Koborko on·ani gitade, Kolkata-o TMC-ni dilgiparang, Meghalaya a·dokni dilgiparangko grongenba, Lok Sabha election-o dakna nanggnirangko u·iatgen aro ia tom·anio TMC Meghalaya parliamentary party-ni dilgipa Mukul Sangma, TMC-ni state president Charles Pyngrope aro gipin dilgiparangba bakko ra·egen.
Ma·mongo TMC-ni dilgiparang namnikgenchimode Tura Parliamentary seat-o Mukul Sangma-ko ba uni jonggipa Zenith Sangma-ko susaatnaba gnang indiba da·o dipet Shillong-ode uamang susana skanirang dongkujaenga ineba kobor on·timgiparang parakataha.
Shillong Lok Sabha seat-oni susana gita Umroi-ni TMC MLA George B Lyngdoh-ko TMC-ni dilgiparang namniktokengachim indiba ua TMC-o an·tangna on·gimin dingtang dingtang kamrangko wattokahani gimin ian ong·na amgijani gita nikna man·skaengaha.
Lok Sabha election-o Congress dolde TMC baksa bakrime susana chanchisamsoanirangba dongengachim aro iani bidingo apsan candidate (common)-ko susaatani giminba da·o Congress dolni dilgiparang chanchirimengahachim.
AICC-ni spokesperson Anuma Acharya-ni aganani gitade, INDIA bloc-ni ning·o TMC baksa bakrime susana gita apsan candidate-ko seokani bidingo da·o AICC-ni dilgiparang chanchirimtokenga.
