TURA: Tura Christian Hospital-ni oxygen plant-ko Sukrobar salo, a·dokni Chief Minister Conrad K Sangma-ni jakchi kulie on·angaha.
Tura Christian Hospital-o oxygen plant-ko kulie on·anganio a·dokni Chief Minister, jinmana aganprakangengon, ia gital oxygen plant-ko kulianichi Tura songjinmao aro Garo Hills-o donggipa manderangnasan ong·aigija Meghalaya a·dok gimikni manderangnan namgni ong·gen ine parakangaha.
Medical department-ni ning·o a·dok sorkarini ka·enggipa kamrangni gimin aganangengon, uni sorkari jako ra·na skangde an·o donggipa me·chikrangni sianirang bang·batachim indiba da·o an·o donggipa me·chikrangni siani aditan komiangaha ine Chief Minister parakataha.
Iako ua politics-ni gita an·tangtangni man·gninasan aganenga ong·ja indiba kakketkosa aganenga ine janapatengon, 2018 bilsio uni sorkari jako ra·na skangde medical-ni kamrang da·o gita ong·jachim ine Sangma aganaha.
Ua somoio a·doko ong·enggipa obostarangko nikesa ua kamrangko nambatatna gita rakbate kamrangko ka·aha ineba ua aganaha.
“Sanna banani kamrangna chingni tangka paisa chamaniara a·songo nambatgipa a·dokrangoni damsa ong·enga maina a·song gimikko nigopate nigenchimode da·alo chingni health department-na tangka paisa chamani 8 percent ong·engani gimin a·song gimiko bang·batgipa ong·enga. Tika su·anikoba niatgenchimode skango an·ching nombor 27-gipasa ong·achim indiba da·alo an·ching nombor gnigipaona tang·doaha,” ine Chief Minister aganaha.
CM’s Special Fund-oniko ua nursing school-ni examination hall-ko rikna gita gong lak 27 tangkarangko chame on·gen ineba Sangma parakataha.
Tura Christian Hospital-o ia oxygen plant-ko kulina gita CM’s Special Fund-ni ning·o gong lak 10 tangkarangko sorkari dakchake on·ahachim.
