SHILLONG: Batanggimin changrangoba Union Home Minister Amit Shah-ko gronge agangrikanichi maming namgnirangko man·jahani gimin da·o uni a·dokona re·bataiani somoioba Khasi Students Union (KSU)-ni dilgipa-rang, Inner Line Permit (ILP)-ko dabiani bidingo agangrikna gronggenma grongjawa name ma·siku-jaenga ine u·iataha.
Batanggimin somoi-rango KSU-ni dilgiparang, ILP baksana Khasi aro Garo ku·sikrangko Constitution-ni Eighth Schedule-o napatchina dabiani bidingo agangrikna gita komibeoba changgittammangnade Union Home Minister-ko grongahachim indiba da·alonan ia dabianirangko ma·mong sorkari chu·so-kate on·kujaengachim.
Union Home Minister Amit Shah, re·baenggipa January-ni 19 tariko, North Eastern Council (NEC)-ni tom·aniko dilna gita Meghalaya a·dokona re·bataiengachim aro ia tom·anio salgro salaram a·dok gimikni chief minister-rangan bakko ra·na siengachim. “ILP aro dingtang dingtang kamrangni bi-dingo chinga Shah-ko changgninade uni Shi-llong-ona re·baanio grongrikaha aro gipin biaprangoba grongaha-chim. Meghalaya a·doko songdongenggipa manderangni ku·rangko knachakaniara ma·mong sorkarini daitoan ong·a-chim indiba chingni dabianirangko ma·mong sorkari knachakjaengani gimin ian chingko chon-nikani gita ong·a,” ine KSU-ni president Lam-bokstar Marngar aganaha.
Indake ong·genchi-moba, uamangni dingtang dingtang dabianirangko Union Home Minister-na u·iattaina gita uko grongani bidingo KSU-ni dilgiparang chanchichenggen ine Marngar parakataha. “A·dokni nanganirangna ua aganchakaniko on·na nangchongmota maina ILP aro Khasi-Garo ku·sikrangko Eighth Schedule-o napatchina dabianide a·dokni sak 60 MLA-rangni resolution ra·gipa aro a·doko songdongenggipa manderangni nangnikanirangsa ong·a,” ine KSU-ni president aganaha.
A·songni manderangna simsak nirokgipa ong·a ine mesokna ian ma·mong sorkarina namgipa chol ong·enga ineba ua aganaha.
Union Home Minister-ko grongna gita KSU-na chol on·aniara a·dok sorkarini jakon ong·gen ineba Marngar parakataha.
Union Home Minister-ko gronggenma grongjawa u·ina man·kujaenga: Khasi Students Union
Date:
Share post:
