SHILLONG: Sombar salo, changbongagipa Meghalaya Games-ko Tura-ni PA Sangma Stadium-o a·songni President Droupadi Murmu-ni do·ga oe on·angani somoio NPP-chi dilenggipa MDA II sorkario bak ong·paenggipa BJP-ni dilgiparangko okamja ine a·dok sorkariko matnangataha.
MDA sorkario BJP-ni bakrimanichisa NPP-chi dilenggipa MDA-II sorkari, ma·mong sorkarioniko pilak namgnirangko man·engachim indiba BJP-kon opposition dol gitasa chane, mande ra·aniko mesokjaenga ineba a·dokni BJP dol matnangataha.
“President-ni Tura-ona re·baani somoioba chingkode okampajaha aro anga saksa Tura-ni MDC ong·e maming okamaniko man·sojaha. President-ni re·baani somoio BJP-ni state president-ko man·chape BJP-ni pilak dilgiparangkon okamjaha,” ine Mongolbar salo, Tura-ni MDC aro BJP-ni state vice president Bernard N Marak, suk ong·gijaniko parakataha.
President-ni re·baani somoio BJP-ni dilgiparangko okamgijaniara namen kragijani ong·aha ine janapatengon, “A·songni President, Tura-ona aro angni constituency-ona re·baengon angaba dongpana nangachim. A·songni President-ko angaba rimchaksona nangao ga·akachim indiba chinga darangkon ia program-ona okamjaha,” ine Marak aganaha.
Marak-ni aganani gitade, President-ni Tura-ona re·baani somoio seoka man·gijagipa bang·a manderangkosa okame, seoka man·gipa BJP-ni MDC-rangko aro party-ni dilgiparangkode watchanggalskaahachim.
“Chingko pangnan uamang iandake nichanggalronga aro ian NPP-ni bewal ong·a,” ine ua aganaha.
Changbongagipa Meghalaya Games-ko Sombar salo, a·songni President Droupadi Murmu, Tura-ni PA Sangma Stadium-o a·bachengate on·angahachim.
