SHILLONG: India a·songni President Droupadi Murmu-ko Mongolbar salo, East Khasi Hills a·jani Mawphlang songo mande ra·bee rimchaksotokaha aro ia biapo ua video conference gita Khongtong, Mawlyngot aro Kudengrim songni Rural Tourism Accomodation-na aro Shillong Peak Ropeway-na pangchakanirangko songe on·angan baksana Rongjeng-Mangsang-Adokgre ramako aro Mairang-Ranigodown-Azra ramakoba oprake on·angjolaha.
Ia tom·anio, a·dokni Chief Minister Conrad K Sangma, Deputy Chief Minister Prestone Tynsong, Deputy Chief Minister Sniawbhalang Dhar, Agriculture Minister Ampareen Lyngdoh, Tourism Minister Paul Lyngdoh aro gipinrangba dongpae bak ra·angaha.
Mawphlang-o jinma tom·aniko ong·atanio a·songni President, jinmana aganprakangengon, Meghalaya a·dokni manderangko grongna man·ahani gimin an·tangni kusi ong·aniko parakatenba, Mawphlang Sacred Groves-ko ripinge rakkiahani gimin ia jolni pagitcham ma·gitchamrangko mittelpilangaha.
“Iandakgipa buring bolgrimrangan an·chingna janggiko on·gipa ong·ani gimin an·ching samtangtango donggipa buring bolgrimrangko ripingna gita rakbee kamrangko ka·na nanga,” ine ua aganaha.
Meghalaya a·dok, ia chasong gital baksa jatni daka rikaniko ripinganio gipinrangna dakmesokgipa ong·na krenge kamko ka·enga ineba a·songni President, mittele aganangaha.
Meghalaya a·doko man·gipa Lakadong holdi aro strawberry-rangni gimin janapatengon, ia bosturangko gipin a·songrangona watanichi Meghalaya a·dokan dal·drobaenggipa dilgipa gita ong·enga ine President Murmu aganaha.
Ia tom·anio uni a·bachengate on·anggipa project-rangni gimin janapatengon, ia rama jal·langrangko taridapanichi a·doko re·a doani kolrangko nambatatgnok aro a·doko namroro silroroaniko ra·bana re·mikkangani gita ong·gnok ine President parakataha.
Jatni aro toromni bebera·anio pangchake Tribal manderang, chengonin samtangtango ong·telaigiparangko ripingna gisik nanggiparang ong·a aro ia daka rikanirangonikon bang·en skie ra·skana man·a ine janapatengon, samtangtango ong·telaigiparangko ripinganio me·chikrangni daitorangkoba President Murmu janapjolangaha.
Ia tom·bimonganio a·dokni Chief Minister Conrad K Sangma-ba jinmana aganprakengon, a·dokona re·bae, dingtang dingtang project-rangko a·bachengate on·angahani gimin a·songni President-ko mittelpilangaha.
Rural Tourism-ni gimin janapatengon, ian Meghalaya a·doko songdongenggipa manderangni janggi tangani bewalko ripinge rakkiani cholsan ong·aigija a·gilsakni gipin biaprangna dakmesokani cholba ong·gen ine Chief Minister parakataha.
Ia tom·anio a·dokni Chief Minister, a·dok sorkarini dingtang dingtang kamrangni giminba a·songni President-na agan-talate on·angjolaha.
President-ni Meghalaya a·dokona re·baaniara kal·susagiparangna, chadamberangna aro self help group-ni me·chikrangnasan ong·aigija Meghalaya a·dok gimikni lak 38 manderangna ka·dongataniko ra·baani gita ong·aha ineba Chief Minister parakataha.
