TURA: Changbongagipa Meghalaya Games-ko a·bachengatani salo, badiaba badiaba dolrangna cha·anirang chu·ongjaenga ine badi ka·anirangko man·soahani gimin Mongolbar salo, Sports & Youth Affairs department aro Meghalaya State Olympics Association (MSOA)-ni official-rang, suk ong·gijaniko parakatenba, iani bidingo talataniko on·ataha.

“Ian skanggipa changna Meghalaya Games-ko iandakgipa gadango aro Tura-o sokachakaniba ong·enga. Meghalaya Games-ko January 15 tariko, a·songni President Droupadi Murmu, Tura-ona re·baenba do·ga oe on·angaha aro ia kal·susaaniko a·bachengatanio dingtang dingtang kal·susagiparang, jatni chrok-mesagiparang, a·dok gimikni chadamberang aro Tura jillani bang·bea volunteer-rangba bakko ra·e chu·sokgipa ong·aha,” ine Meghalaya Games-ni organising committee parakataha.

Meghalaya Games-o bak ra·enggipa manderangna cha·ani ringanirangko on·na gita dingtang dingtang babilsirang aro cha·chak ringchakani biaprangko tarisoaha ine janapatengon, “Meghalaya Games-ko do·ga oe on·angani somoio bakgni dake katepgimin cha·anirangko kal·susagiparangna on·aha indiba President re·baengani gimin chel·chakanirangko on·anio ja·manchakatako man·e, mitam dolrang cha·ani chu·ongjani gimin badi ka·aha indiba uamangni neng·nikanirangko official-rang ta·raken nirokataha. PA Sangma Stadium-o program matchota bakan pilak dining room-rangon attamni 7:00 bajion mi attamoba on·aha,” ine Meghalaya Games-ni organising committee, talataniko on·ataha.

Meghalaya Games-o bak ra·enggipa mitam dolrang iandakgipa neng·nikanirangko chagrongna nangahani gimin organising committee, kemakoba bi·ataha.

“Mitam manderang neng·nikanirangko chagrongna nangaha ine anga ma·sichaka aro iana chinga organising committee namen suk ong·ja. Meghalaya Games-o kal·susaenggipa pilak dolrangna on·enggipa canteen-rangko somoi gitan kulienga aro namnamgipa cha·anirangkon on·enga. Chingni kamrango banoba olgrokanirang donggenchimode chinga uarangko namatna jotton ka·enga aro ia kal·susaani matchotkujaskal chinga kal·susagiparangni namgnina kamko ka·angkugen,” ine MSOA-ni working president John Kharshiing parakataha.