TURA: Tura-o sokachakenggipa Meghalaya Games-o kal·susagiparangna mirangni pal, ma·manti cha·anirangkosa pack ka·e on·skaenga aro ian kal·susaanio bak ra·enggipa manderangna kenchakna nangani ong·enga ine Meghalaya Games-o bak ra·enggipa mitam dolrang badi ka·doangtokaha.
Sombar aro Mongolbar salrango, a·songni President Droupadi Murmu, Tura-ona re·baahani gimin Tura jillani bang·bata dokkanrangkon chiptokahachim aro iani a·sel kal·susaanio bak ra·enggipa manderang, cha·anirangko aro mongsongbate mi bijakrangko man·jae neng·nikanirangko chagrongna nangtokahachim.
Iani bidingo talataniko on·angskaengon, kal·susaanio bak ra·enggipa manderang, seng·gnangan kal·chakram biaprangona sokna nangtokani gimin pringon nanga gita cha aro cha·anirangko on·skaenba salpaksachibara mirangni pal, ma·manti cha·anirangko on·skaachim ine ia Meghalaya Games-ko sokachakenggipa manderang aganaha.
“Niamo pangchake, kal·susagiparangna mi bijakni pal stadium-o ma·manti cha·anirangko pack ka·e on·skaaha. Unbaksana kal·susaanio bak ra·enggiparangna chinga seng·gnangan pack ka·gimin miattamoba on·aha,” ine Meghalaya Games-ko ong·atenggipa manderang talataniko on·angaha.
Indake ong·genchimoba, kal·susaanio bak ra·enggiparangna cashew nut bang·gija, samosa chonchona ge·gni, aluni patty, packet chongipa chips, frooty ge·sa aro bhujiya packet-sakosan on·aiaha ine bak ra·enggipa manderang matnangatskaaha.
East Khasi Hills Swimming Team-ni manager Syrpailin Wanniang-ni parakatani gitade, kal·susaanio bak ra·giparang namgipa cha·anirangko cha·na nanga ine ma·sioba uamangna misalko on·ani pal, ramram cha·anirangkosa on·skaahachim aro misalkon uamangna attamni 7:30 bajimangosa on·skaahachim.
Sombar salo, President-ni Tura-ona re·bae Meghalaya Games-ko a·bachengate on·angani somoio uamangko PA Sangma Stadium ning·chi chi ra·napna on·jaha indiba stadium ning·o uamangna ringani chirangkoba organiser-rang tarisoskajaha ineba Wanniang, suk ong·gijaniko parakataha.
“Chingko stadium ning·chi chi ra·napna on·jagenchimode stadium ning·o uamang an·tangtangan chingna ringani chirangko tarisoskana nangachim indiba indakeba ong·jaha. Oe chinga President-na chel·chakaniko nangani giminde ma·sia indiba chimangmangkode chingna on·na nangachim,” ine ua aganaha.
Uni bi·sarangna on·gipa cha·anirang chu·ongjani gimin uamang a·palchikosa cha·anirangko bree cha·na sandiangna nangaha ineba Wanniang suk ong·gijaniko parakataha.
“Uamango plate 6-mangni gitasan mi dongaia aro ukon sak 40-na batpile suale cha·na nangenga indiba chingni bi·sarang maikai bilake kal·susana man·gen? Cha·animangmangkode name on·gen ine chinga ka·dongsoengachim indiba iako nike chinga namen suk ong·jaha,” ine East Khasi Hills Swimming team-ni manager parakataha.
Indake ong·engon, Meghalaya State Olympics Association (MSOA)-ni gitasa ia Meghalaya Games-o cha·ani ringanirangko nirokenga ine kobor on·timgiparang u·iataha.