TURA: Mingsa misilbegipa a·sel ong·anio, West Garo Hills a·jani Rongram police station ning·o donggipa Babadam jolo, mande saksa, ka·saninggija dake an·tangni ma·gipakon sko sote so·otaha.
Police-rangni u·iatani gitade, dos dakgipa mandeara Babadam jolo donggipa Chidaogre songoni bilsi 25 ong·gipa Sengjon Ch Sangma ong·achim aro ua an·tangni ma·gipako, attechi sko sotaha.
Sianggipa me·chikara bilsi 45 ong·gipa Dijak Ch Sangma ong·achim ineba police-rang u·iataha.
Ma·gipako sko sote so·otani ja·man dos dakgipa mande, nokoni kate dongenga aro ia koborko seatengmiting somoiona kingkingde police-rang uko rim·na man·kujaenga.
Indake ong·engon, dosko dakgipa mande, batanggimin somoirangoba an·tangni pagipa aro adatangkoba apsan daken so·otna jotton ka·anirang dongahachim ine kobor on·timgiparang u·iataha.
