SHILLONG: Bongagipa Meghalaya Games-ko Tura-o sokachakanio, bak ra·enggipa manderangna chu·onga gita cha·ani ringanirangko on·jaenga ine badi ka·doangtokahani ja·man KSU aro HITO dolrangba, a·dok sorkariko matnangataha.
Iani bidingo sorkariko matnangatengon, Meghalaya Games-o bak ra·enggipa manderangna cha·ani ringanirangko simsakjaenga ine badi ka·aniara ia kal·susaaniko ong·atenggipa dolrangni bako dal·bea gualani ong·enga ine KSU-ni sports secretary Eric Nongkynrih parakataha.
Kal·susaanio bak ra·giparangna chips aro samosa gita dakgipa cha·anirangko mini pal on·aniara kraani ong·ama ineba ua sing·doataha.
Kal·susagipa manderangna pangnan namgipa cha·ani ringanirangkosa on·na nanga ine janapatengon, Meghalaya Games-o bak ra·enggipa manderangna mirangko chu·onggija on·ani aro ong·gija dakgipa cha·anirangkosa on·aniara uamangni be·en bimangna kenchakna nanganiba ong·enga ine Nongkynrih parakataha.
Meghalaya a·doko kal·susaaniko tang·doatna miksongmanchaenga ong·ode a·dok sorkari, kal·susaanio bak ra·enggipa manderangna namgipa cha·ani ringani, dongchakani aro re·a doani cholrangko on·na nanga ineba KSU-ni sports secretary parakataha.
“Kal·susagipa manderangna sorkari iandake simsak nirokanirangko on·ja ong·ode kal·susaanio gisik nanggipa aro uamangni ma·a paarangba kal·susaanirango bak ra·atna sikjawa,” ine Nongkynrih parakataha.
Indake ong·engon, Meghalaya Games-o bak ra·enggipa manderangna cha·ani ringanirangko chu·onggija on·enga ine matnangenggipani bidingo chu·gimik sandirokaniko dakchina gita HITO dabiangskaaha.
Iani bidingo a·dokni Sports Minister Shakliar Warjri-na sedoatengon, “Ia Meghalaya Games-ko sokachakenggipa department aro dingtang dingtang dolrangni kamrangni gimin sandirokaniko dakchina chinga dabienga. Kal·susaanio bak ra·enggipa manderangna iandake simsak nirokanirangko on·jaenggipa official-rangni kosako rakgipa ja·kurangko de·na nanga,” ine HITO-ni president Donbok Dkhar parakataha.
Ia Meghalaya Games-ko ong·atna gita gong kror 23-na baten tangka paisarangko sorkari chamataha ong·ode maini a·sel kal·susaanirango bak ra·enggipa manderangna cha·ani ringanirangko name on·na man·jaenga ineba Dkhar sing·doataha.
 |
ReplyForward
|
