TURA: Tura-ko Second/Winter Capital songchina dabienggipani bidingo A·chik Holistic Awakening Movement (AHAM), adita salrangna skang a·songni President Droupadi Murmu-ni Tura-ona re·baani somoio memorandum-ko on·ataha.
Tura-ko Winter Capital songchina dabienggipani bidingo a·songni President-na talate on·angengon, Provisional Meghalaya Legislative Assembly-ni skanggipa session-ko 1970 bilsini April 14 tariko, Tura-ni District Council Hall-o ong·atahani gimin aro Meghalaya a·dokko man·dile on·gipa pagitchamrangni nangnikanian Tura-ko Winter ba Second Capital songani ong·ani giminsa da·alo Garo Hills-ni dingtang dingtang dolrang, Tura-ko Winter ba Second Capital songchina dabitokenga ine AHAM-ni president George Prince Cheran Momin parakataha.
“Meghalaya a·dokko a·dokni mongsonggipa jatgittam, chong·motan Garo, Jaintia aro Khasirangni namgninasa, Garo Hills, Khasi Hills aro Jaintia Hills jolrangko nangrimate aro apsan namroro silroroani baksa apsan gadangko on·na gita bikotaha. Iani giminsa Meghalaya a·dokko man·dile on·gipa pagitchamrangba, ia jatgittamni gisepo apsan namroro silroroani cholrangko on·na gita a·doko damgni capital ba skotong songjinmako songna niksamsoani gnang kamko ka·aha,” ine Momin, a·songni President-na talataniko on·atenba, Tura-ko Meghalaya a·dokni Winter ba Second Capital songgenchimode Garo Hills-oba pilakni gitan namroro silroroaniko ra·bapana man·genchim ine parakataha.
Jengjal-ni Baljek Airport-ko ta·raken a·bachengatna nangengani giminba AHAM-ni President-na sedoatgipa memorandum-o janapataha.
“Baljek Airport-ko 2008 bilsion kulie on·ahaoba da·alonan manderangni namgnina ia airport-ko chalaina man·chipkujaengani gimin ia airport-ko tarianio maiba chu·onggijani ba namgijani donggenchimode ta·raken iarangko taridapenba, kamrangko a·bachengna nangenga,” ine AHAM-ni president parakataha.
Baljek Airport-ko ta·raken chalaina nangengahani gimin janapatengon, ia airport-ko a·bachengatna man·genchimode Garo Hills-oba ta·raken namroro silroroaniko ra·bana man·genchim maina aeroplane-rango manderangkosan ong·aigija bosturangkoba salrurana man·e ian jolo tang·doaniko ra·bana man·genchim ine Momin parakataha.
Dhubri-Phulbari dolongko ta·rake matchotatchina gitaba AHAM, a·songni President-na sedoatgipa chittio janapataha.
“Assam a·dokni Dhubri-oni West Garo Hills-ni Phulbari-ona gital rikenggipa dolongara Assam aro Meghalaya a·dokni mongsonggipa cholguga gita ong·enga maina ia dolongko matchotahaode, a·dok damgnini gisepo ta·rakbate re·grik dogrikna cholrangko man·an baksana bading chiwalani aro pilak kamrangon ta·rakbatna man·gnok,” ine Momin parakataha.
Ia Dhubri-Phulbari dolongara, Garo Hills-o namroro silroroani chol gitasan ong·aigija bading chiwalani, kamrangko ka·e cha·ani, aro pilakni gitan namgni ong·gnok ineba AHAM-ni president parakataha.
Indake ong·engon, West Bengal a·dokni Balurghat-Hili-oni Bangladesh gita Garo Hills-ona rama taribana manchienggipakoba ta·raken a·bachengatchina gita AHAM, a·songni President Droupadi Murmu-ko didiataha.
