TURA: West Garo Hills a·jani Selsella jolrango salantian mongmarang re·ramengani a·sel jolo songdongenggipa manderangna kenchakna nangani ong·enga ine Selsella-ni ASWA aro FKJGP dolrang parakatenba, Selsella jolrango songdongenggipa manderangna naljokaniko on·na gita ta·raken ja·kurangko de·china West Garo Hills Division-ni Divisional Forest Officer (DFO)-na sedoataha.
Ia NGO-rangni parakatani gitade, batanggimin antirangonin, mongmarang ia jolrangona re·bae, manderangni dongchakenggipa biaprango naprongenga aro ian jolo songdongenggipa manderangna namen kenchakna nangani ong·engachim.
“Ia mongmarang, manderangni nokonaba re·ange manderangna kenjagokataniko on·engani gimin ta·raken manderangni namgnina chel·chakanirangko on·china chinga mol·molenga. Ia jolo songdongenggipa manderangna maming a·sel ong·anirangko chel·chakna gita ta·raken ja·kurangko de·na nangchongmotenga,” ine Selsella-ni ASWA aro FKJGP dolrang, West Garo Hills Division-ni DFO-na sedoatgipa chittio janapataha.
Ia jolona ta·raken wildlife official-rangko watatenba, manderangni songdongchakenggipa biaprangoniko mongmarangko a·rikgalatna gita ja·kuko de·chinaba ia dolgni NGO-rang, forest official-ko didiataha.
Ia sal somoirango Garo Hills-ni bang·bata biaprangon mongmarang re·ramengani a·sel songni nokni manderangna aro songre songgabatenggipa manderangna kenchakna nanganirang ong·engachim.
Batanggimin somoirango Garo Hills-ni badiaba badiaba biaprango, mongmarang chadrapani a·sel manderangni sianirangkoba nikna aro knasona man·ahachim.
