TURA: Adita salrangna skang Supreme Court-ni raiko on·ani ja·man, a·dokni elementary skulrango skigiparangko ra·na sorkarini u·iataniko ra·pilchina gita Garo Hills Youth Organisation (GHYO), Shillong-o donggipa School Education & Literacy-ni Director-na, Meghalaya sorkarini Chief Secretary-na, Education department-ni Commissioner & Secretary-na aro Shillong-o donggipa Directorate of Education Research and Training (DERT)-na sedoataha.
GHYO-ni u·iatani gitade, 2022 bilsini SLP (C) Nos. 23583-84-o pangchake Supreme Court-ni raiko on·atani ja·man a·dokni dingtang dingtang Government LP aro UP skulrango skigiparangko ra·na advertisement on·aniko ra·pilchina gita uamang, Shillong-o donggipa School Education & Literacy-ni Director-na, Meghalaya sorkarini Chief Secretary-na, Education department-ni Commissioner & Secretary-na aro Shillong-o donggipa Directorate of Education Research and Training (DERT)-na sedoataha.
“Elementary education-na National Institute of Open Schooling (NIOS)-ni ra·gipa ja 18-ni Diploma in Elementary Education (D.El.ED) ODL course-ara bilsi 2-ni diploma baksa apsan ong·ja ine Supreme Court raiko on·aha aro ia ja 18-ni diploma course-kode kam ka·sogimin skigiparangnasa one-time window dake NIOS on·aha ineba Supreme Court rai on·aha. Uni gimin bilsignini diploma course-de ja 18-ni diploma course baksa apsan ong·ja aro ian niamo ong·jaenga,” ine GHYO-ni president parakataha.
Ja 18-ni D.El.Ed course-ko pass ka·giparangde kam ka·soenggipa skigiparangnasan choliaia ine janapatengon, gital kamo ra·na gitade ja 18-ni D.El.Ed donggiparangko ong·ja indiba bilsignini diploma donggiparangkosa ong·na nanga ine GHYO parakatenba, a·dokni dingtang dingtang LP aro UP skulrango skigiparangko ra·na tik ka·aniko dontongkuchina sorkariko didiataha.