TURA: Ra·gala man·gipa Meghalaya Lokayukta-ni official sakgittamko kamo ra·pilchina dabiani bidingo Chief Minister Conrad K Sangma-chi dilenggipa MDA-II sorkari, maming aganchakaniko on·jahani gimin Sukrobar sal dipet Voice of the People’s Party (VPP)-ni membor-rang, Meghalaya Secretariat mikkango asonge jingjengatna a·bachengatahani gimin Garo Hills-oni Human Rights & Anti Corruption Youth Power of India (HRACYPI)-ba chakpaaniko parakataha.
“Lokayukta-ni inquiry officer-rangko kam ra·galaniara niamni a·palo ong·a aro iani bidingo VPP-ni membor-rang, jingjengatanirangko dakengani gimin chingaba uamang baksa bakrimaniko on·enga. Chingaba Meghalaya a·doko songdongenggipa manderang ong·e, tangka paisa jakkalsretaniko aro iandake Lokayukta-ni official-rangko niam gri kam ra·galahani gimin VPP baksa bakrimaniko on·e sorkarini kosako raken jegalaniko dakenga,” ine HRACYPI-ni working president Kingstone Bolwari parakataha.
Tangka paisa jakkalsretaniko warachakanio ku·cholsan ong·china a·doko songdongenggipa manderangko didiatengon, a·doko tangka paisa jakkalsretaniko aro sorkarini dingtang dingtang department-rango politics-ni gita kam on·aniko VPP-ni jegalengani giminba HRACPI mittelpilaniko parakataha.
Lokayukta-ni official-rangko kamoni neng·takgimin official-rangkode songna man·ja aro kamo ong·enggipa official-rangonikosa songna nanga ine sorkarini aganchakgipa kattarangko jegalatskaengon, “Meghalaya Lokayukta Act-ni Section 10(2)-o kamo ong·kuenggipa officer-rangkosan Lokayukta-o Inquiry-ni Director aro Prosecution-ni Director songna man·a ine maming janapani dongja. Uni gimin kamoni neng·takgimin sorkari officer-rangko Lokayukta-ni officer songanioba maming champengani dongja,” ine Bolwari parakataha.
Garo Hills Autonomous District Council (GHADC)-o da·o ong·enggipa NPP MLA-ni tangka jakkalsretaniko parakatani ja·man a·dok sorkari, Lokayukta-ni Investigation Officer sakgittamko Whatsapp message gita kam ra·galatahachim ine nikna man·a.
Ra·gala man·gipa official-rangara, Inquiry & Prosecution-ni Director (gitcham IPS officer) J Rymmai aro Inquiry-cum-Investigating Officer sakgni R Pde aro Anil K Sangma ong·achim.
Indake ong·engon, ra·gala man·gipa Lokayukta-ni official-rangko kamo ra·pilchina dabie Sukrobar sal dipet VPP-ni membor-rang, Secretariat sambao asonge jingjengatna a·bachengatahachim.