Meghalaya BSF sak 3 drugs badingsrukgipa baksa yaba tablet rong 1728-ko rim·a

2024 bilsini January 19 tariko Republic Day ong·na am·enggipana chel·chakgipa dolko donanio nipilaniko dakangaha, koborrangko man·soanio 193 Bn BSF Meghalaya sakgittam drugs badingsrukgipa manderangko rim·aha, uamangoniko Yaba tablet rong 1728-ko man·aha. South West Khasi Hills district-ni PS-Ranikor-ni ning·o am·sandianiko dakangaha. Rim·a man·gipa drugs badingsrukgipa manderang bike bolgnio songreengachim, uamangko BSF dolchi don·dipate sing·sandianiko dakaha jemangan Ranikor sepango sima ari donggipaona re·angengachim.
Rim·a man·gipa manderangko bilsi 25 ong·gipa Somison Sangma, bilsi 23 ong·gipa Jenel D. Sangma aro bilsi 27 ong·gipa Gopal Barman, uamang gimikan East Khasi Hills district-ni PS-Dangar-ni ning·o ga·akgipa Nokrianala-o songdonggiparang ong·a. Rim·a man·gipa manderangko aro yaba tablet samrangko am·sandianiko dakangdapna man·a gita PS-Ranikor-na pakwate on·angaha.
Dingtang am·sandigipao, koborrangko man·soenba, Meghalaya 110 Bn sipairang biatgipa na·tokrang baksa sak 9 India-ni badingsrukgipa manderangko rim·aha, Bangladesh-oni India-ona badingsrukbaengachim. Iani bidingo mikkangchi am·sandianiko dakdapangna rim·gipa manderangko aro bosturangko Custom office Shella-ni jako pakwate on·angaha.
Sima ari jolo niamgri kam ka·giparangko rim·na BSF dolni on·kanganirang chu·sokaniko man·engaha. Aro sima ario maming dakgipa a·selrangko chagrongjana gita BSF dol nirokenga.