Lok Sabha election-na candidate-rangko dorgasto galchina Congress okama

SHILLONG: Ia bilsini Lok Sabha election-o Shillong aro Tura Parliamentary seat-rango Congress doloni susana sikenggipa manderangko dorgasto galchina gita a·dokni Congress dol okamataha.
Iani bidingo kobor ra·timgiparangna talataniko on·angengon, ia Lok Sabha election-o Congress dolni tikitrangko darangnaba mikkang nitee on·ani dongjawa, uni gimin seokako man·gipa MP, MLA ba MDC-rang pilakan tikitko man·na ka·donge dongaigija dorgastorangko galchina ine Congress Legislature Party (CLP)-ni dilgipa Ronnie V Lyngdoh parakataha.
Shillong Parliamentary seat-na da·o ong·enggipa Lok Sabha MP Vincent H Pala-nan Congress dolni tikitko on·piltaigenma ine sing·anina aganchakaniko on·angengon, “Chingo niamrang donga aro chinga candidate-rang pilakkon dorgasto galchina okamenga,” ine Lyngdoh aganaha.
Shillong aro Tura Lok Sabha seat damgnio susana sikenggipa manderang pilakkon dorgasto galchina Congress okamataha ineba CLP-ni dilgipa aganaha.
Meghalaya Pradesh Congress Committee (MPCC)-ni dilgiparang, ia dorgastorangko January-ni 23 ba 24 tariko nipilenba, candidate-rangko seokani bidingo chanchianggen ineba Lyngdoh parakataha.
Shillong Parliamentary seat-na Pala-kon Congress candidate ong·piltaina krae nikengoba Tura Lok Sabha seat-nade da·o dipet candidate-ko name ma·sikujaengachim.
Congress dolni mitam chadambe dolrang, Gambegre-ni Congress MLA Saleng A Sangma-ko Tura parliamentary seat-ni candidate-na nangniktokengon, mitam me·chik dolrangde Williamnagar-ni gitcham MLA aro a·dokni gitcham cabinet minister Deborah C Marak-ko nangniktokskaenga ine adita salrangna skangsan MPCC-ni dilgiparang parakatahachim.
Tura Parliamentary election-rango Purno A Sangma-ni nokdang baksa susagiparangoni Deborah Marak-mangmangsan Sangma-ni nokdangko chena sigipa ong·aiachim maina gipin susagiparangde Sangma-ni nokdang baksa susaanio maming daken sokrikpajahachim ine nikna man·a.
Indake ong·genchimoba, Saleng Sangma-ba Congress dolo napangani ja·man, Garo Hills-ni bidingo ku·rang on·batgipa ong·e Garo Hills-o da·o niksengbatgipa dilgiparangoni saksa ong·skaengachim.