SHILLONG: Sonibar salo, Meghalaya Day-ko maniani somoio a·dok sorkarini a·bachengate on·anggipa state anthem ba a·dokni gito Jaintia ku·sikkode watchanggalahani gimin Jaintia Students’ Union (JSU) suk ong·gijaniko parakatenba, ia gitko taridapchina a·dok sorkariko didiataha.
Ia state anthem ba a·dokni gito Khasi aro Garo ku·sikrangchisan ring·aiahachim indiba ia gitni video-o a·dokni mongsonggipa jatgittam, chong·motan, Garo, Khasi aro Jaintia jatgittamni bimangrangkon aro daka rikanirangkon mesokskaahachim.
Ia gitko Khasi ku·sikchi a·bachengataha aro ja·mano English-chi ring·angenba, bon·kamao A·chikkuchi ring·e English-ona ra·bapilahachim. Ia gitni video-o jatgittimni manianirang, chrokanirang aro biaprangkoba mesokahachim.
Indake ong·engon, ia a·dokni gito Jaintia ku·sikkode watchanggalahani gimin JSU suk ong·gijaniko parakatenba, ia gitko taritaichina sorkariko didiataha.
“Ian a·dokni gitsa ong·engani gimin sorkari, ia gitko taridapna nanga. Ia state anthem ba a·dokni gito Jaintia ku·sikkon watchanggalahaoba manderangchi seoka man·gipa Jaintia Hills-ni dilgiparangde maming ku·rangko on·jaenga,” ine JSU-ni dilgiparang parakataha.
A·dokni gito Jaintia ku·sikko watchanggalahani gimin sorkariko matnangatengon, ia gitko Garo, Khasi aro Jaintia ku·sikrangchin ring·na man·na gita English ku·sikni pal Jaintia ku·sikko on·skachina JSU dabiangaha.
