SHILLONG: Shillong Lok Sabha constituency-na United Democratic Party (UDP) aro Hill State People’s Democratic Party (HSPDP) dolrangni nangrime bikotgipa Regional Democratic Alliance (RDA)-ni candidate Robertjune Kharjahrin-ko mesoke aro talate on·na gita Mongolbar salni 11:00 bajimango dingtangmancha Shillong-o donggipa UDP office-o ong·atenga.
Ia tom·anio, UDP aro HSPDP dolgnini dilgiparang, MLA-rang aro MDC-rangba dongpae bak ra·angtokgen.
Iani bidingo kobor ra·timgiparangna u·iatengon, ia tom·aniona uamang dingtang dingtang a·jani, bipekni, me·chik aro chadambe dolrangni president aro secretary-rangkoba okamataha ine Robibar salo, UDP-ni working president Titosstarwell Chyne parakataha.
Chyne-ni u·iatani gitade, ia tom·anio RDA-ni candidate Robertjune Kharjahrin-ba jinmana aganprakangenba, ia election-na an·tangni miksongani aro chanchisamsoanirangko talate on·anggen.
Ia Lok Sabha election-o RDA, Congress aro NPP gita bilakgipa dolrang baksa susagrikengoba, Shillong-o Congress-ni seat-ko ra·sekna gita UDP aro HSPDP dolgnini dilgiparangan ka·dongskaengachim.
