SHILLONG: Robibar salo Meghalaya a·dok bilsi 52 gapahaoba, India a·songo donggipa bang·bata a·dokrangna baten pilakni gitan ja·manchakkuenga.
Meghalaya a·dokni bilsi 52 gapani bidingo, a·doko songdongenggipa manderang aro dingtang dingtang dilgiparangni chanchianiko sing·sandiaton, mitamrang a·dokni dingtanganiko nikna man·ahani gimin aro mitamranga pilakni gitan namroro silroroani donggijaniko ku·wattokaha.
A·dokni saksa cabinet minister aro politician Ampareen Lyngdoh-ni aganani gitade, bilsi 52 gapanio Meghalaya a·doko pilakni gita namroro silroroaniko nikna man·engaha.
Bilsi 50 gapanio Meghalaya a·dok, an·seng baljokaniko on·ani kamrang bang·en tang·doaha aro sanna bananirangko on·anio manderangna dam komiao on·na man·engaha ine ua aganaha.
“An·chingni rama jal·langrang namen nambataha aro angni re·anggipa mitam a·dokrangna batede namen nambataha. An·chingni bazar antirangko niatgenchimoba manderangni nangnikani gita pilak bosturangkon man·engaha. Manderangni janggi tangani gadangko niatgenchimoba, pilakni gitan tang·doaha,” ine Lyngdoh aganaha.
Indake ong·genchimoba, lekka poranio a·dokko namdapatna man·kugen ineba ua aganaha.
A·dokni Tourism Minister Paul Lyngdoh-ni aganani gitade, a·dokni bilsi 52 gapanio, basakoba tang·doaniko aro basakoba tang·onaniko nikna man·aha, so·sojengjeng ong·anirangkoba aro dingtanganikoba nikna man·skaaha.
Dingtang dingtang kamrang, jekai agriculture, textiles, cooperative societies gita dakgipa kamrang chu·sokgipa ong·aha indiba an·seng baljokani aro rama jal·langrangko namdapatna nangkuenga ineba Lyngdoh aganskaaha.
A·dokni gitcham police officer aro BJP-ni dilgipa M Kharkrang-ni parakatskaani gitade, Meghalaya a·dok bilsi 52 ong·pilengahaoba pilakni gitan namdapaniko nikna man·skakujaengachim.
“Meghalaya a·dok bilsi 52 ong·pilahani gimin dambekuenggipa a·dok ong·jahachim aro an·chingna bate chonchonbatgipa aro dambebatgipa a·dokrangan an·chingna bate ta·rakbate namroro silrorona man·engaha,” ine Kharkrang aganaha.
Meghalaya a·dokko dingtangatna gitade, manderangni chanchiani bewalkoba dingtangatna nanggen ine janapatengon, a·doko altuae bading chiwale cha·na on·na sikjagenchimode a·doko invest ka·na sikgipa manderangde a·dokona re·bana sikjawa ine Kharkrang parakataha.
A·dokni bilsi 52 gapani bidingo gitcham officer Toki Blah-ba an·tangni chanchianiko parakatengon, bilsi 52 ong·pilonan State Anthem ba a·dokni ring·anikosa tarina man·engkua indiba a·doko maming namroro silroroanirangde dongkuja ine parakataha.
Sakgipin politician Jemino Mawthoh-ba an·tangni chanchianiko parakatengon, bilsi 52 gapanio a·dok bewalan tang·dona man·aha indiba manderangni nangnikani gita ong·kujaenga ine parakataha.
CSWO-ni president Agnes Kharshiing-ba an·tangni chanchianiko parakatengon, Meghalaya a·dokko man·aoni bilsi 52 gappilahaoba, mitam kamoni neng·takgimin officer-rangde, chadamberangna kamtangtangko wate on·na sikskakujaenga ine matnangataha.
