TURA: South Garo Hills a·jani Chokpot jolo donggipa Budugre songo niam gri ro·ong bikotaniko champengna gita sorkari maming ja·kurangko de·jaenga ine GSU aro Chokpot Area Vigilance Committee (CAVC) matnangatenba, ia jolo niam gri ro·ong bikotaniko champengatjagenchimode mikkangchi rakbata ja·kurangko de·anggen ine mikrakataniko on·angaha.
Ia dolrangni parakatani gitade, Budugre songo niam gri ro·ong bikotaniko champengchina gita batanggimin bilsirangonin jolo songdongenggipa manderang aro dingtang dingtang dolrangba changni chang sorkarina u·iatahachim.
“Batanggimin bilsirangonin ia jolo niam gri ro·ong bikotaniko champengchina chinga dabitokengachim indiba da·alonan ia biapo niam gri ro·ong bikotaniko nikna man·kuenga. Iandake niam gri ro·ong bikotaniko songni nokni dilgiparang aro jolo songdongenggipa manderangba jegaltokengachim indiba sorkari, manderangni jegalaniko knachakjaenga. Ia biapo niam gri ro·ong bikotenggipa manderang, Garo Hills Autonomous District Council (GHADC)-ni nangchongmotgipa lekkarangba dongjani giminsa chinga iako jegalenga,” ine GSU aro CAVC-ni dilgiparang parakataha.
“Budugre songo donggipa Dareng chisamrangoniko niam gri ro·ong bikotengani a·selan ia chiringna aro chio donggipa na·tok na·batrangna nangchakeaniko ra·baengaha. Ia Dareng chiringonikon ka·ma jolrango donggipa songni manderangba ringna aro dingtang dingtang kamrangna jakkalengachim indiba ia chiringonikon niam gri ro·ong bikotengani a·sel songni manderang neng·nikanirangko man·engaha,” ineba dolgni NGO-rang parakataha.
Samtangtango ong·telaigiparangko chel·chakna gita dongimin niamrangko ja·rike ia biapo niam gri ro·ong bikotaniko champengatchina sorkariko didiatengon, ia dabianiko knachakjagenchimode mikkangchi rakbata ja·kurangko de·e jingjengatanirangko dakanggen ine GSU aro CAVC dolrang mikrakataniko on·angaha.