TURA: North Garo Hills a·jani Adokgre jolo donggipa Tingba songo, Jal Jeevan Mission-ni kamrangko matchote ka·ja aro kamrangkoba name ka·ja ine songni sordarrang, North Garo Hills a·jani Deputy Commissioner-na badi ka·doangaha.
Tingba songni sordarrang, chong·motan Brenal Sangma aro Elodin Marak-ni Deputy Commissioner-ba badi ka·doangani gitade, ia songo JJM-ni kamko ka·gipa contractor-rang, kamrangko matchotgija donaiaha aro kam ka·anirangba namgijasa ka·aiahachim.
“Tingba Village Committee-ni ge·etanio pangchake chinga, chingni Tingba songo JJM-ni kamrangko matchotgija ka·ahani gimin aro kamrangko name ka·jahani gimin kam ka·gipa contractor aro official-rangni kosako badi ka·doenga,” ine songni sordarrang, Deputy Commissioner-na sedoatgipa chittio janapatenba, iani bidingo kamko ka·gipa contractor aro nangchakegipa officer-rangni kosako ta·raken ja·kurangko de·china didiataha.