TURA: North Garo Hills a·ja gita niam gri gue badingenggipani bidingo songsalna kam ka·gipa mande saksa Maxbirth G Momin, North Garo Hills a·jani magistrate-ko grongna miksongenga.
Myanmar a·songni gue gran (supari)-rangko Bangladesh a·song gita India a·songona badingsrukbaenga ine re·anggipa January 4 tarikosan ua (Momin), North Garo Hills a·jani gitcham deputy commissioner-na badi ka·doangahachim ine nikna man·a.
Momin-ni badi ka·doangani gitade, ia guerangko Bangladesh gita ra·bae, South Garo Hills, West Khasi Hills aro North Garo Hills a·ja gita Assam aro a·songni dingtang dingtang biaprangona badingatskaengachim.
North Garo Hills a·jani National Highway (NH-62) rama gita niam gri koelarangko salruraengoba, check gate-rango maming champenganirang dongjaenga ineba Momin, badi ka·doangahachim.
Momin-ni parakatani gitade, ia koelarangko South Garo Hills a·jaoniko niam gri bikotenba, North Garo Hills a·ja gita Assam a·dokona salangrongengachim.
Gue aro koelarangko niam gri salani bidingo ua apsan salon, North Garo Hills a·jani gitcham deputy commissioner-na badi ka·doangaha aro iani bidingo sandirokna gita gitcham DC, NGH-ni MCS officer N Hajong-na pakwatangahachim.
Indake ong·engon, gue aro koelarangko niam gri North Garo Hills a·ja gita salengani gimin ua re·baenggipa January-ni 31 tariko North Garo Hills a·jani magistrate-ko grongenba, una talbatatnirangko on·anggen ine Momin parakataha.