WILLIAMNAGAR: Mongolbar salo, India sorkarini MSME Ministry, Tura-ni MSME-FO aro East Garo Hills a·jani DCIC baksa nangrime, PM Vishwakarma-ni bidingo awareness program-ko Williamnagar-ni DRDA Hall No 1-o ong·atangaha.
Ia awareness program-ko ong·atanio, East Garo Hills a·jani Deputy Commissioner Vibhor Aggarwal, mongsonggipa sokgipa ong·e jinmana aganprakengon, ia PM Vishwakarma scheme-ni ning·o, jakni kamrangko ka·e cha·enggipa gimik sak lak 77 manderang a·song gimiko register ka·aha ine parakatenba, ia PM Vishwakarma scheme-ni namgnirangko jinmana agan-talate on·angaha.
Ia program-ko ong·atanio MSME-ni Director Vinamra Mishra-ba jinmana aganprakengon, ia PM Vishwakarma scheme-ko 2023 bilsini September 17 tariko a·songni Prime Minister Narendra Modi, jakni kamrangko ka·e cha·enggipa manderangna dakchakanirangko on·na gita a·bachengataha ine talate on·angaha.
Ia PM Vishwakarma scheme-ni ning·o dingtang dingtang jakni kamko ka·e cha·enggiparang, jekai atte doke cha·giparang, a·ani bosturangko tarigiparang, napitrang, ba·ra sikgiparang, ro·ong doke cha·giparang aro uandakgipa manderangna namgnirangko on·enga ineba Mishra parakataha.
Ia program-ko ong·atanio, East Garo Hills DRDA-ni Project Director Albert G Momin-ba jinmana aganprakengon, jakni kamrangko ka·e cha·enggiparang, mongsongbate chadamberangko re·mikkangbae, ia scheme-ni ning·o on·enggipa namgnirangko ra·china ku·pattiangaha.
